សម្លេងម្ចាស់ឆ្នោត​កម្ពុជា

ជាថ្មីម្តងទៀតនៅព្រឹកថ្ងៃពុធនេះ គណបក្សសង្គ្រោះជាតិ​ បានដាក់លិខិតមួយ​ទៅសាលា​រាធានី​ភ្នំពេញ​ដើម្បី​ស្នើ​យក​​ទីលាន​​​ប្រជាធិបតេយ្យ សម្រាប់ធ្វើការជួបជុំការឃោសនា ការបោះឆ្នោតជ្រើសរើសក្រុមប្រឹក្សា រាជធានី/ខេត្ត ក្រុង/ស្រុក/ខ័ណ្ឌ សម្រាប់​​​​​អាណត្តិ​ទី២នេះ បន្ទាប់ពីការស្នើ​សុំ​លើក​ទី​មួយ​ កាលពីថ្ងៃទី១៨ ខេមិនាមុននេះបន្តិច ត្រូវបានសាលារាជធានីភ្នំពេញ​បដិសេធមិនផ្តល់ឲ្យ។ 

ជាលិខិតលើកទី២ ដែលស្នើសុំទីលានប្រជាធិបតេយ្យដើម្បីធ្វើការជួបជុំការឃោសនា ការបោះឆ្នោតជ្រើសរើស​ក្រុមប្រឹក្សា នៅក្នុងលិខិតដែលចុះហត្ថលេខាដោយលោក ម៉ន ផល្លា ជាគណៈកម្មាធិការប្រតិបត្តិរាជធានីភ្នំពេញ បានបញ្ជាក់ថា ចាប់ពី​ថ្ងៃទី​០២ ខែឧសភា ដែលជាថ្ងៃចាប់ ផ្តើមយុទ្ធនាការឃោសនាបោះឆ្នោត គណបក្សសង្គ្រោះ ដឹងចាប់ផ្តើមការជួបជុំគ្នាជាមួយបេក្ខជន​តំណាងរាស្រ្ត និងសមាជិក​ក្រុមប្រឹក្សា​ក្នុងដំណែង​មកពី​​គបក្សសមរង្ស៊ី និងគណបក្ស​សិទ្ធិ​មនុស្ស មុននឹង​ធ្វើការ​ហែរ​ក្បួន​ទៅតាមដងផ្លូវនានាក្នុងរាជធានីភ្នំពេញ។

ទាក់ទងនឹងបញ្ហានេះ នៅក្នុងពីធីតែងតាំង និងផ្ទេរភារកិច្ច ចៅសង្កាត់និរោធ និងថ្នាក់ដឹកនាំសង្កាត់មួយចំនួនទៀត កាលពីថ្ងៃទី១៩ ខែមេសា គឺក្រោយមួយថ្ងៃនៃការដាក់លិខស្នើសុំជាលើកទីមួយរបស់គណបក្សសង្គ្រោះជាតិ លោក ប៉ា សុជាតិវង្ស អភិ​បាល​រាជធានីភ្នំពេញ បានមានប្រសាសន៍ថាសាលារាជធានីភ្នំពេញ​នឹ​ងមិន​ផ្តល់​ទីតាំង​ទីលាន​ប្រជាធិបតេយ្យ​ដើម្បីធ្វើការជួយបជុំណាមួយនោះទេ ដរាបណា​តុលាការ​មិនទាន់​បញ្ចប់ការ​ស៊ើបអង្កេត​ការករណី​ការផ្ទុះអំពើហិង្សា​ក្នុងព្រឹត្តិការណ៍​បាតុកម្ម​នាពេលកន្លងមក ដែលបណ្តាលឲ្យមនុស្សមួយចំនួនបានស្លាប់។

បន្ថែមពីនេះទៀត គណៈកម្មាធិការជាតិរៀបចំការបោះឆ្នោត (គ.ជ.ប) ក៏បានចេញជាសេចក្តីណែនាំ​ដល់សាធារណៈជន និងភាគីពាក់ព័ន្ធឲ្យបានដឹងផងដែរថា កុំឲ្យប្រែក្លាយការឃោសនា​បោះឆ្នោតទៅជា​ការ ធ្វើ​បាតុកម្មឲ្យសោះ។