សម្លេងម្ចាស់ឆ្នោត​កម្ពុជា

គម្រោងរៀបចំពិធីដង្ហែអដ្ឋិធាតុ ព្រះបរមរតនកោដ្ឋ បានធ្វើឡើងនៅក្នុង កិច្ចប្រជុំអន្ដរក្រសួង ដែលដឹកនាំដោយ សម្ដេចចៅហ្វាវាំង វរវៀងជ័យ អធិបតី ស្រឹង្គារ គង់ សំអុល ប្រធានគណៈកម្មាធិការជាតិរៀបចំបុណ្យជាតិ.អន្ដរជាតិ សម្រាប់ការត្រៀមរៀបចំក្បួនហែព្រះ បរមអដ្ឋិធាតុ ព្រះបរមរតនកោដ្ឋ យក ទៅតម្កល់នៅព្រះសក្យចេតិយព្រះកែវ មរកត(ក្នុងព្រះបរមរាជវាំង) ។

លោកខៀវ កាញារីទ្ធ រដ្ឋមន្ដ្រី ក្រសួងព័ត៌មាន និងជាអ្នកនាំពាក្យរាជរដ្ឋាភិបាលបានមានប្រសាសន៍ឱ្យដឹងថា កិច្ចប្រជុំដើម្បីលើកគម្រោងដង្ហែអដ្ឋិធាតុ ព្រះបរមអដ្ឋិធាតុ ព្រះករុណា ព្រះបាទ សម្ដេចព្រះ នរោត្ដម សីហនុ ព្រះមហាវីរក្សត្រ ព្រះរាជវររាជបិតា ជាតិខ្មែរ ព្រះបរមរតនកោដ្ឋ ដែលនឹងធ្វើនៅថ្ងៃទី ថ្ងៃទី១០,១១ និង១២ ខែកក្កដាឆ្នាំ ២០១៤ ក្បួននិងដង្ហែចាប់ផ្ដើមចេញ ដំណើរពី ព្រះបរមរាជវាំងចុះតាមសារ មន្ទីរជាតិ ចុះតាមផ្លូវព្រះនរោត្ដម ហើយ យកទៅតម្កល់នៅព្រះសក្យចេតិយ ព្រះកែវមរកត (ក្នុងព្រះបរមរាជវាំង)។

លោកបានបញ្ជាក់ថា ការធ្វើនេះ គឺតាមព្រះរាជបណ្ដាំរបស់ព្រះករុណា ព្រះបាទសម្ដេចព្រះ នរោត្ដម សីហនុ ព្រះមហាវីរក្សត្រ ព្រះរាជវររាជបិតា ជាតិខ្មែរ ព្រះបរមរតនកោដ្ឋ ដែល ព្រះអង្គបានចង្អុលបង្ហាញផ្ដាំទុកតាំងពី ព្រះអង្គ កាលនៅមានព្រះជន្ម ហើយ នេះជាព្រះរាជពិធីមួយដ៏ធំ ដែល ព្រះបរមរតនកោដ្ឋ មានគុណបំណាច់ដ៏ ធំធេងសម្រាប់ប្រទេសជាតិព្រះអង្គ ។

ក្បួនហែព្រះបរមអដ្ឋិធាតុនេះ មានចំនួន ៤ផែន និងមានអ្នកចូលរួមសរុបចំនួន ១.៩៧៥នាក់ដែលមានពាក់ស្លាកសញ្ញា នៃព្រះរាជពិធីបុណ្យ ។ ចំណែកក្បួន ថ្មើរជើង មានចំនួន ២.២២០នាក់ ។

សូមរំលឹកថា ព្រះករុណា ព្រះបាទសម្ដេចព្រះ នរោត្ដម សីហនុ ទ្រង់ចូលទិវង្គតនៅថ្ងៃចន្ទ ទី១៥ ខែ តុលា ឆ្នាំ ២០១២ ត្រូវនឹងថ្ងៃ ១៥រោច ខែភទ្របទ ឆ្នាំរោង ចត្វាស័ក វេលា ម៉ោង១និង២០នាទីយប់នៅទីក្រុង ប៉េកាំងប្រទេសចិន។ នៅថ្ងៃទី១៧ខែ តុលា ឆ្នាំ២០១២បន្ទាប់ពីគ្រូពេទ្យចិន បានរៀបចំព្រះបរមសពព្រះមហាវីរក្សត្ររួចរាល់ស្អាតបាតចប់សព្វគ្រប់ ហើយនោះព្រះបរមសពព្រះមហាវីរក្សត្រ ត្រូវបានដង្ហែចេញពីមន្ទីរពេទ្យដើម្បី ដង្ហែព្រះបរមសពព្រះអង្គមកកាន់ មាតុភូមិកម្ពុជាវិញ ។

យោងតាមគេហទំព័ររស្មីកម្ពុជា ចេញផ្សាយនាថ្ងៃទី២៧ ឩសភា ឆ្នាំ២០១៤។

(Photo from http://english.sina.com/)