សម្លេងម្ចាស់ឆ្នោត​កម្ពុជា

គិតត្រឹមថ្ងៃសុក្រ ទី២០ ខែមិថុនានេះ មានពលករខ្មែរជាង២១ម៉ឺននាក់ហើយ ដែលត្រូវបានរដ្ឋាភិបាល កម្ពុជា ដឹកជញ្ជូនដល់ស្រុកកំណើត និងគោលដៅនានាដែលពួកគេចង់ទៅទូទាំងប្រទេស។ ក្នុងចំណោមពលករជាង២សែននាក់ មានជាង២ម៉ឺននាក់ជាកុមារ ដែលថៃបញ្ជូនមកជាមួយឪពុកម្ដាយ។ នេះបើតាមការបញ្ជាក់ពីលោកស្រី ជូ ប៊ុនអេង រដ្ឋលេខាធិការក្រសួងមហាផ្ទៃ។

លោកស្រី ជូ ប៊ុនអេង រដ្ឋលេខាធិការក្រសួងមហាផ្ទៃ និងទទួលបន្ទុកជាអនុប្រធានគណៈកម្មការត្រួតពិនិត្យ សហការសម្របសម្រួលបញ្ហាពលករដែលថៃចាប់បញ្ជូនមក  បានបញ្ជាក់ប្រាប់គេហទំព័រថ្មីៗ នៅព្រឹកថ្ងៃសុក្រទី ២០ ខែមិថុនានេះ ថារដ្ឋាភិបាល ជាពិសេសគណៈកម្មការរបស់លោកស្រី នឹងរៀបចំកិច្ចប្រជុំអន្តរក្រសួងចាប់ពីដើមសប្ដាហ៍ក្រោយ ដើម្បីរិះរកយន្តការបន្តដោះស្រាយបញ្ហារបស់ពលករ ជាពិសេសបញ្ហាប្រឈមរបស់កុមារ ដែលមានជាង២០ភាគរយនៃពលករដែលថៃចាប់បញ្ជូនមកនោះ។  

បើតាមលោកស្រី ជូ ប៊ុនអេង ការសម្លឹងរកអនាគតជូនកុមារ ដែលមកពីប្រទេសថៃជាមួយឪពុកម្ដាយ គឺជារឿងអាទិភាព ដែលមិនអាចពន្យារការដោះស្រាយបានឡើយ។ លោកស្រីបានបង្ហាញសុទិដ្ឋិនិយមយ៉ាងដូច្នេះ៖ «រឿងនេះ (កុមារ) យើងមិនអាចបណ្ដែតបណ្ដោយបានទេ ពីព្រោះកុមារទាំងនោះ ស្ទើរតែទាំងអស់ពួកគែមិនបានរៀនសូត្រឡើយ។ មានកុមារតិចតួចដែលកើតនៅថៃ ពួកគេពិបាកប្រើភាសារខ្មែរតែម្ដង។ ដូច្នេះយើងនឹងរៀបចំកិច្ចប្រជុំជាមួយអន្តរក្រសួងពាក់ព័ន្ធ ដើម្បីដោះស្រាយបញ្ហាជូនពួកគេ ពិសេសការទទួលបានការសិក្សារៀនសូត្រ»។  ដើម្បីឲ្យកុមារទាំងនោះមានឱកាសបានទទួលការសិក្សារៀនសូត្រគ្រប់ៗគ្នានោះ លោកស្រីរដ្ឋលេខាធិការ ចង់ឃើញម្ដាយឪពុកដែលជាអាណាព្យាបាល ឈប់វិលត្រឡប់ទៅធ្វើការនៅប្រទេសថៃ។  

ពាក់ព័ន្ធនឹងការងារដោះស្រាយបញ្ហាជូនកុមារនោះដែរ លោកស្រីបានប្រកាសបើកចំហរឲ្យមានការចូលរួមពីសំណាក់ដៃគូរអង្គការសង្គមស៊ីវិលជាតិ និងអន្តរជាតិផងដែរ ខណៈដែលលោកស្រីអះអាងថាក្រសួងមហាផ្ទៃ នឹងសហការជាមួយក្រសួងអប់រំ យុវជន និងកីឡា ដើម្បីដោះស្រាយបញ្ហានេះ។

ដកស្រង់ពីគេហទំព័រថ្មីៗចេញផ្សាយថ្ងៃទី២០ មិថុនា ឆ្នាំ២០១៤។

(Photo from http://www.aljazeera.com/humanrights/2014)