សម្លេងម្ចាស់ឆ្នោត​កម្ពុជា

សេចក្តីថ្លែងការណ៍​របស់​ថ្នាក់ដឹកនាំ និង​មន្ត្រី សាលា​រាជធានី​ភ្នំពេញ ផ្សព្វផ្សាយ​នៅ​ថ្ងៃទី​១៧ មិថុនា​ បាន​សម្តែង​ការខកចិត្ត ទៅ​នឹង​នាយក​អង្គការ Human Rights Watch ប្រចាំ​តំបន់​អាស៊ី លោក ប្រែ​ត អាដាម (Brad Adams) ដែល​បាន​វាយប្រហារ ចោទប្រកាន់ មកលើ​លោក​ជា ស៊ីម តាមរយៈ​អត្ថបទ​មួយ​ក្រោម​ចំណងជើង​ថា “Cambodia: Chea Sim Death Show Failings of Khmer Rouge Court”​ ​មានន័យ​ថា មរណភាព របស់លោក ជា ស៊ីម ជា​ការបរាជ័យ​របស់​សាលាក្តី​ខ្មែរក្រហម ក្នុង​ការនាំ​សមាជិក​ខ្មែរ​ក្រហម​មួយ​ចំនួន​មក​កាត់ទោស។ សាលា​រាជធានី​ភ្នំពេញ ​ចាត់ទុកថា ការចោទប្រកាន់ របស់លោក ប្រែ​ត អាដាម មិន​មាន​មូលដ្ឋាន​ច្បាស់លាស់ ហើយ​ធ្វើឱ្យ​ប៉ះពាល់​ដល់​កិត្តិយស​លោក​ជា ស៊ីម។

សូមបញ្ជាក់ថា ​នាយក​អង្គការ Human Rights Watch ប្រចាំ​តំបន់​អាស៊ី លោក ប្រែ​ត អាដាម (Brad Adams) កាលពីថ្ងៃទី៩ ខែមិថុនា គឺមួយថ្ងៃក្រោយលោក ជា ស៊ីម ទទួលមរណភាព អង្គការឃ្លាំមើលសិទ្ធិមនុស្សអន្តរជាតិ (Human Right Watch ) បានចេញសេចក្ដីថ្លែង ការណ៍របស់ខ្លួន ដោយសរសេរថាលោក ជា ស៊ីម គឺជាអតីតកម្មាភិបាលខ្មែរក្រហមមួយរូប ដែលគេមិនដែលបានស៊ើបអង្កេតពីបទឧក្រិដ្ឋអន្តរជាតិធ្ងន់ធ្ងរ ដែលអាចចោទប្រកាន់ ពីបទប្រល័យពូជសាសន៍ និងឧក្រិដ្ឋកម្មប្រឆាំងមនុស្សជាតិ នៅក្នុងរបបខ្មែរក្រហម ព្រោះលោក ជា ស៊ីម គឺជាកម្មាភិបាលមួយរូបក្នុងស្រុកពញាក្រែក ខេត្តកំពង់ចាម ចាប់ពីឆ្នាំ១៩៧៥ ដល់១៩៧៨ ៕