គ.ជ.ប រើសបុគ្គលិក ២៤០០ នាក់សម្រាប់ចុះឈ្មោះបោះឆ្នោត
2015-07-15 10:26:00 4926 Viewsគណៈកម្មាធិការជាតិរៀបចំការបោះឆ្នោតគ្រោងជ្រើសរើសបុគ្គលិកចំនួន ២៤០០ នាក់ពាក់ព័ន្ធនឹងផ្នែកកុំព្យូទ័រដើម្បីធ្វើការងារនៅក្នុង ឃុំ-សង្កាត់សរុបចំនួន ១៦៣៣ ទូទាំងប្រទេសក្នុងដំណើរការចុះឈ្មោះអ្នកបោះឆ្នោតតាមប្រព័ន្ធ អេឡិចត្រូនិកដែលរំពឹងថានឹងចាប់ផ្តើមនៅដើមឆ្នាំក្រោយ។ នេះបើតាមលោក ហង្ស ពុទ្ធា អ្នកនាំពាក្យ គ.ជ.ប ដែលបានបញ្ជាក់កាលពីម្សិលមិញ។ លោក ហង្ស ពុទ្ធា បានថ្លែងថា៖ «យើងមិនទាន់ដឹងថាតើវាចំណាយអស់ប៉ុន្មាននៅឡើយទេពីព្រោះយើងនៅ កំពុងរង់ចាំការដេញថ្លៃដោយអ្នកជំនាញជប៉ុន»។
លោកបានថ្លែងបន្តថា រដ្ឋាភិបាលជប៉ុននៅទីបំផុតបានសម្រេចជួយផ្នែកកុំព្យូទ័រ server ដល់មជ្ឈមណ្ឌលកុំព្យូទ័ររបស់គណៈកម្មាធិការជាតិរៀបចំការបោះឆ្នោត សម្រាប់ការចុះឈ្មោះអ្នកបោះឆ្នោតតាមប្រព័ន្ធអេឡិចត្រូនិកហើយនឹង បញ្ជូនអ្នកជំនាញកុំព្យូទ័រជប៉ុនម្នាក់មកធ្វើការងារនៅក្នុង មជ្ឈមណ្ឌលកុំព្យូទ័ររបស់ គ.ជ.ប នៅខែតុលា។
អនុប្រធាន គ.ជ.ប លោក គួយ ប៊ុនរឿន និងអ្នកជំនាញជប៉ុន Ryuichi Tomizawa បានចាប់ផ្តើមជជែកគ្នាតាំងពីថ្ងៃទី ៧ កក្កដា ដើម្បីទទួលបានអនុសាសន៍អំពីរបៀបថាតើរដ្ឋាភិបាលកម្ពុជាគួររៀបចំ នីតិវិធីចុះបញ្ជីឈ្មោះអ្នកបោះឆ្នោតដោយប្រើប្រាស់បច្ចេកវិទ្យាថ្មី យ៉ាងដូចម្តេចព្រមទាំងការបង្កើតបញ្ជីអ្នកបោះឆ្នោតឌីជីថល។ នេះបើតាមសេចក្តីប្រកាសព័ត៌មានដែលចេញបន្ទាប់ពីកិច្ចប្រជុំថ្ងៃ ចុងក្រោយកាលថ្ងៃទី ១០ ខែកក្កដា។
បើតាមសេចក្តីប្រកាសព័ត៌មាននេះបានឲ្យដឹងថា៖«ខាងជប៉ុនគាំទ្រ សម្រាប់ការធ្វើតេស្តការចុះបញ្ជីអ្នកបោះឆ្នោតតាមប្រព័ន្ធ អេឡិចត្រូនិក»។ «គ.ជ.ប សម្ដែងការដឹងគុណចំពោះជប៉ុនដែលបន្តពង្រឹងកិច្ចសហប្រតិបត្តិការ សម្រាប់កំណែទម្រង់ការបោះឆ្នោតក្នុងប្រទេសកម្ពុជាហើយសង្ឃឹមថា កិច្ចសហប្រតិបត្តិការនេះនឹងបង្កើតទំនុកចិត្តដល់អ្នកបោះឆ្នោត និងភាគីពាក់ព័ន្ធទាំងអស់»។
លោក ពុទ្ធា បានថ្លែងថា គ.ជ.ប កំពុងគ្រោងចាប់ផ្តើមការធ្វើតេស្តការចុះបញ្ជីឈ្មោះអ្នក បោះឆ្នោតតាមប្រព័ន្ធអេឡិចត្រូនិកនៅខែតុលាហើយអ្នកបោះឆ្នោតគួរ អាចចុះឈ្មោះបានជាមួយប្រព័ន្ធថ្មីនេះនៅដើមឆ្នាំ ២០១៦។
លោក គល់ បញ្ញា នាយកប្រតិបត្តិនៃគណៈកម្មាធិការដើម្បីការបោះឆ្នោតដោយសេរី និងយុត្តិធម៌នៅកម្ពុជាហៅកាត់ថា ខុមហ្វ្រែល បានអំពាវនាវឲ្យ គ.ជ.ប ជ្រើសរើសបុគ្គលិកយ៉ាងហោចណាស់ឲ្យបាន ២ ៥០០ នាក់ដែលត្រូវការសម្រាប់ក្រុមចុះបញ្ជីបោះឆ្នោតដើម្បីចុះបញ្ជីអ្នក បោះឆ្នោតប្រមាណ ១០ លាននាក់។
លោក បញ្ញា បានថ្លែងឲ្យដឹងបន្តទៀតថា៖ «វាមិនមែនជាចំនួនខុសគ្នាខ្លាំងទេប៉ុន្តែប្រសិនបើយើងមាន ក្រុមច្រើននោះនឹងធានាថាការចុះបញ្ជីបានទៅដល់ភូមិទាំងអស់ចំនួន ១០ ០០០ ហើយនឹងធ្វើឲ្យពេលវេលាលឿនជាងសម្រាប់ការចុះបញ្ជីឈ្មោះអ្នក បោះឆ្នោត»៕ប្រភពភ្នំពេញប៉ុស្ត៏
ផែនទីលទ្ធផលបោះឆ្នោត
ភាពមិនប្រក្រតីនៃការបោះឆ្នោតឆ្នាំ២០១៣
ស្តាប់ការផ្សាយវិទ្យុសម្លេងសង្គមស៊ីវិល តាមប្រព័ន្ធអ៊ិនធើណែត
7:30AM-8:30AMAsk the Candidate
COMFREL FACEBOOK PAGE
ប្រភពព័ត៌មានបោះឆ្នោតផ្សេងៗ
| Power by: |
|