Cambodian Voter's Voice

នាយករដ្ឋមន្ត្រី ហ៊ុន សែន រំឭកពីវិនាសសកម្មសង្គ្រាមក្រោយរបបថ្មីឡើងកាន់អំណាច

2015-11-10 09:23:00 4871 Views

នាយករដ្ឋមន្ត្រីដែលកាន់អំណាចជាង៣០ឆ្នាំមកនេះ បានក្រើនរំឭកជាថ្មីទៀត ដល់សាធារណៈជន ឲ្យចងចាំ ពីវិនាសកម្មសង្គ្រាម ដែលកើតចេញពីការផ្លាស់ប្តូរមេដឹកនាំ ដោយរបបលោក លន់ នល់ ធ្វើរដ្ឋប្រហាទម្លាក់សម្តេចព្រះនរោត្តមសីហនុ ចេញពីអំណាច។ការផ្ញើសារនយោបាយ របស់លោកនាយករដ្ឋមន្ត្រី ហ៊ុន សែន នេះបានធ្វើឡើងចំពេលដែលកម្ពុជាប្រារព្ធខួប៦២ឆ្នាំនៃទិវាបុណ្យឯករាជ្យជាតិ។នៅលើបណ្តាញសង្គមផ្ទាល់ របស់លោកនាយករដ្ឋមន្ត្រី បានសរសេរថា ថ្ងៃបុណ្យឯករាជ្យជាតិលើកទី ៦២ ថ្ងៃ៩ ខែវិច្ឆិកា ឆ្នាំ១៩៥៣ និងថ្ងៃទី៩ ខែវិច្ឆិកា ឆ្នាំ២០១៥ ជាថ្ងៃមួយដែលប្រជារាស្ត្រខ្មែរទូទាំងប្រទេសចងចាំជានិច្ច នូវព្រះរាជបូជនីយកិច្ចដ៏ថ្លៃថ្លាបំផុត របស់ព្រះករុណាព្រះមហាវីរក្សត្រសម្តេចព្រះនរោត្តមសីហនុ ព្រះបរមរតនកោដ្ឋ ដែលព្រះអង្គបានតស៊ូ និងលះបង់គ្រប់យ៉ាងក្នុងការទាមទារឯករាជ្យ ពីបារាំងជូនជាតិមាតុភូមិ។