ថ្លែង​ក្នុងពិធីបិទកិច្ចប្រជុំប្រចាំឆ្នាំលើកទី១ ស្តីពីការងារឆ្លើយឆ្លងព័ត៌មានទូរទស្សន៍ជាតិកម្ពុជាឆ្នាំ២០១៤ កាលពីចុងសប្ដាហ៍កន្លងទៅនេះ ឯកឧត្តម ខៀវ កាញារីទ្ធ បានមានប្រសាសន៍ថា នៅចុងឆ្នាំ២០១៤នេះ ក្រសួងសហការជាមួយក្រុមហ៊ុនស៊ុបព្រីមណែត នឹង​​បើកឲ្យប្រើប្រាស់លើប្រព័ន្ធផ្សាយថ្មី សម្រាប់បើកមើលតាមដានកម្មវិធីផ្សាយរបស់ទូរទស្សន៍ទាំងអស់ ខណៈពេលដែលការខកខានមើលកម្មវិធីណាមួយនោះ។

ប្រព័ន្ធផ្សាយថ្មីនេះអាចមើលការផ្សាយឡើងវិញបាននៅតាម ស្ថានីយទូរទស្សន៍នីមួយៗឬកម្មវិធីអ្វីមួយដោយរក្សាទុកនូវទិន្នន័យ ក្រោយពីការផ្សាយក្នុងរយៈពេល១សប្ដាហ៍ ដោយគ្រាន់តែចុច មើលថ្ងៃខែដែលបានផ្សាយរួច និង អាចរក្សាទុកការផ្សាយបាន រហូត​ដល់១សប្ដាហ៍។

លោក​បញ្ជាក់ថា ក្រសួងព័ត៌មាននឹងធ្វើការជូនដំណឹងដល់ស្ថានីយទូរទស្សន៍ទាំងអស់ ត្រូវរៀបចំឯកសារ និង ទីតាំងនៅតាមស្ថានីយនីមួយៗដាក់មកក្រសួងឲ្យបានច្បាស់លាស់ ដើម្បីឲ្យក្រសួងងាយស្រួលក្នុងការ ពិនិត្យតាមដាននិង គ្រប់​គ្រង​លើ​ប្រព័ន្ធ​ផ្សាយ​ថ្មី​​នេះជាមួយក្រុមហ៊ុនស៊ុបព្រីមណែត ដែលគ្រប់ការផ្សាយ របស់ទូរទស្សន៍ទាំងអស់ និង អាចមើលព័ត៌មាន ការកម្សាន្ដ និង កម្មវិធីផ្សេងៗទៀត ដែលអាចមើលការ ផ្សាយឡើងវិញបានកន្លងហួសក្នុងរយៈពេល ១សប្ដាហ៍នៅគ្រប់ស្ថានីយទូរទស្សន៍។

លោកបន្ត​​លើកឡើងថា នៅឆ្នាំ២០១៥ខាងមុខនេះ ក្រសួងមានគម្រោងជាច្រើនសម្រាប់បណ្ដុះបណ្ដាល ធនធានមនុស្ស និង រៀបចំការផ្លាស់ប្ដូរប្រព័ន្ធឌីជីថល ក្នុងការបំបែកទូរទស្សន៍ជាតិកម្ពុជាជា៣ឬ៤ប៉ុស្ដិ៍បន្ថែម ទៀត ដើម្បីបង្កើនការផ្សព្វផ្សាយ និង បញ្ចូល​នូវ​កម្មវិធីកម្សាន្ដ ការអប់រំ និង កម្មវិធីជាច្រើនទៀតសម្រាប់ឆ្លើយ តបទៅតាមតម្រូវការរបស់ប្រជាពលរដ្ឋនៅក្នុងប្រទេស និង ក្រៅប្រទេស។

បច្ចុប្បន្ននេះស្ថានីយទូរទស្សន៍សរុបមានចំនួន១៨ ដែល នៅឆ្នាំ២០១៥ខាងមុខ ក្រសួងព័ត៌មាន គ្រោងនឹងផ្លាស់ប្ដូរប្រព័ន្ធផ្សាយពីអាណូឡូកឲ្យទៅជាប្រព័ន្ធឌីជីថល ស្របទៅនឹងបណ្ដាប្រទេសជាសមាជិក អាស៊ាន សម្រាប់​ការ​ត្រៀម​ខ្លួន​ធ្វើ​សមាហរណ​កម្ម​សេដ្ឋ​កិច្ច​អាស៊ាន។

ប្រភពពី៖ http://abcnonstop.net