មិន ឃិន ថា ណាហ្គាត្រូវរើចេញពីដីពុទ្ធសាសនបណ្ឌិត្យ
ដោយព្យាយាមកុំឲ្យមានការព្រួយបារម្ភថា រដ្ឋាភិបាលកំពុងអនុញ្ញាតឲ្យ NagaCorp ពង្រីកដីរបស់ខ្លួនដល់វិទ្យាស្ថានពុទ្ធសាសនបណ្ឌិត្យ រដ្ឋមន្រ្តីក្រសួងធម្មការ និងសាសនា លោក មិន ឃិន កាលពីម្សិលមិញ បានអះអាងថា អ្វីក៏ដោយដែលត្រូវបានសាងសង់ដោយក្រុមហ៊ុនកាស៊ីណូនេះនៅលើដីវិទ្យាស្ថានពុទ្ធសាសនបណ្ឌិត្យ នឹងត្រូវរើចេញចាប់ពីពេលនេះ។
បន្ទាប់ពីការសួរសំណួររយៈពេលជិត ៣ ម៉ោងដោយគណៈកម្មការសាសនារបស់រដ្ឋសភា លោក មិន ឃិន បានអះអាងថា ការសាងសង់ត្រូវបានផ្អាកហើយ។
លោកបានប្រាប់អ្នកកាសែតបន្ទាប់ពីការសួរសំណួរបិទទ្វារថា៖ «សម្រាប់វិទ្យាស្ថានពុទ្ធសាសនបណ្ឌិត្យ មិនកំពុងជួលដីឬលក់វា ឬអនុញ្ញាតឲ្យមានការអភិវឌ្ឍណាមួយទេ ហើយចំពោះការរើសំណង់នោះ យើងកំពុងរៀបចំនិតីវិធីរើវានាពេលឆាប់ៗនេះ។ លោក ឃិន ថ្លែងបន្តថា៖ «ឥឡូវនេះ ខ្ញុំសូមប្រាប់អ្នកទាំងអស់គ្នាថា យើងកំពុងបញ្ឈប់សំណង់នេះ»។
បន្ទាប់ពីផ្នែកនៃរបងនិងខ្លោងទ្វារនៃវិទ្យាស្ថាននេះត្រូវបានវាយកម្ទេច កាលពីដើមឆ្នាំនេះ ដែលនាំឲ្យមានការតវ៉ា រដ្ឋាភិបាលបានថ្លែងកាលពី ខែឧសភា ថា ខ្លួនគ្រាន់តែអនុញ្ញាតឲ្យក្រុមហ៊ុន Naga Corp សាងសង់អនុស្ថានីយអគ្គិសនីនៅលើដីរបស់វិទ្យាស្ថាននេះដើម្បីផ្គត់ផ្គង់អគ្គិសនីទៅសណ្ឋាគារថ្មីមួយរបស់ក្រុមហ៊ុននេះ នៅផ្លូវម្ខាងទៀតប៉ុណ្ណោះ។
ប៉ុន្តែកាលពីខែមុន ភ្នំពេញ ប៉ុស្តិ៍ បានចុះផ្សាយថា ក្រុមហ៊ុននេះបានប្រាប់អ្នកវិនិយោគអំពីផែនការសាងសង់សណ្ឋាគារមួយទៀតនៅលើដីវិទ្យាស្ថាន។
បើតាមលោក យ៉ែម បុញ្ញឫទ្ធិ តំណាងរាស្រ្តគណបក្សប្រឆាំង និងជាប្រធានគណៈកម្មការធម្មការ និងសាសនានៃរដ្ឋសភាឲ្យដឹងថា អនុស្ថានីយនេះឥឡូវនេះ នឹងត្រូវប្តូរទីតាំងផងដែរ។
លោកបន្តថា៖ «យើងនឹងទៅមើលដោយផ្ទាល់ភ្នែកនិងស្នើសុំឲ្យរដ្ឋាភិបាលជួយក្រសួងធម្មការ និងសាសនាទទួលបានថវិកាគ្រប់គ្រាន់...ដើម្បីជួយឲ្យវិទ្យាស្ថាននេះរីកចម្រើន»។
បើតាមការថតសំឡេងនៃការសួរសំណួរកាលម្សិលមិញ លោក មិន ឃិន បានប្រាប់ទៅតំណាងរាស្រ្តថា Naga Corp មិនបានផ្តល់ប្រាក់ណាមួយ ដើម្បីប្រើប្រាស់ដីរបស់វិទ្យាស្ថានទេ ខណៈកំពុងសាងសង់នៅក្រោមដីនេះ។
លោកថា៖ «មិនមានការជួលទេ។ Naga ខ្ចីដីរបស់យើង។ គ្រាន់តែមានកិច្ចព្រមព្រៀងខ្ចីប៉ុណ្ណោះដើម្បីឲ្យពួកគេទុកសម្ភារសំណង់ម៉ូតូ និងរថយន្តនៅលើដីវិទ្យាស្ថាន»។
ការឆ្លើយតបនេះបានធ្វើឲ្យមានការរិះគន់ពីលោក បុញ្ញឫទ្ធិ ដោយសួរថា ហេតុអ្វីបានជាក្រុមហ៊ុនដែលមានប្រាក់ចំណូលខ្ពស់នេះ មិនផ្តល់ប្រាក់សូម្បីតែមួយសេន៕
