កាលពីថ្ងៃទី៦ ខែកក្កដា លោក រៀល ខេមរិន្ទ្រ បានផ្ញើលិខិតមួយច្បាប់ទៅលោក វ៉ា គឹមហុង ដើម្បីបបួលលោកទៅពិនិត្យមើលបង្គោលព្រំដែនកម្ពុជា-វៀតណាមជាមួយ គ្នា នៅចំណុចដែលមានហិង្សាកើតឡើងកាលពីចុងខែមិថុនា ក្នុងស្រុកកំពង់រោទ៍ ខេត្តស្វាយរៀង នៅថ្ងៃទី១៩ កក្កដាខាងមុខ។
ប៉ុន្តែ ប្រធានគណៈកម្មាធិការកិច្ចការព្រំដែនកម្ពុជាលោក វ៉ា គឹមហុង មានប្រសាសន៍ថា លោកនឹងមិនទៅពិនិត្យមើលព្រំដែននៅខេត្តស្វាយរៀងនៅថ្ងៃទី១៩ ខែកក្កដា តាមការបបួលរបស់តំណាងរាស្ត្រគណបក្សសង្គ្រោះជាតិលោក រៀល ខេមរិន្ទ្រ នោះទេ។
ឆ្លើយទៅកាន់អ្នកសារព័ត៌មានបន្ទាប់ចេញពីកិច្ចប្រជុំគណៈកម្មាធិការ ចម្រុះកិច្ចការព្រំដែនកម្ពុជា-វៀតណាមនៅព្រឹកថ្ងៃពុធនេះ ដែលបានចោទសួរលោកពាក់ព័ន្ធនឹងករណីដែលលោក រៀល ខេមរិន្ទ្រ បបួលលោកចុះទៅពិនិត្យព្រំដែននោះ លោក វ៉ា គឹមហុង មានប្រសាសន៍ថា « ខ្ញុំមានកាត្វកិច្ចអីទៅគោរពលោកឯកឧត្ដមហ្នឹងខ្ញុំនៅខាងរដ្ឋាភិបាលទេ គាត់នៅនីតិបញ្ញត្តិ ខ្ញុំនីតិប្រតិបត្តិគាត់នៅស្ថាប័ននីតិបញ្ញត្តិ (អ្នកសារព័ត៌មាន៖គាត់ចង់ឲ្យឃើញជាក់ស្ដែងឯកឧត្ដម គាត់ថាអញ្ចឹង)អញ្ចឹងទៅមើលខ្លួនឯងទៅ»។