កិច្ចប្រជុំបូកសរុបលទ្ធផលការងារប្រចាំឆមាសទី១ និងលើកទិសដៅការងារឆមាសទី២កាលពីថ្ងៃទី២០ ខែ កក្កដានា ខេត្តបន្ទាយមានជ័យ ស្នងការនគរបាលជាតិ លោក អាត់ ខែម បានធ្វើការព្រមានខ្លាំងៗទៅមន្ត្រីនគរបាលការពារព្រំដែន នៅក្នុងភូមិសាស្ត្រក្រុងប៉ោយប៉ែត មិនឲ្យទទួលយកប្រាក់ពីប្រជាពលរដ្ឋ ដោយអនុញ្ញាតឲ្យពួកគេឆ្លងដែនទៅធ្វើការ ឬទៅរកស៊ីនៅប្រទេសថៃខុសច្បាប់ទៀតឡើយ។
លោក អាត់ ខែម ស្នងការនគរបាលជាតិ បានបន្ថែមថាបើសិនជាមន្ត្រីនគរបាលទាំងនោះ នៅតែបន្តសកម្មភាពយកប្រាក់ពីពលករខ្មែរទៀតនោះ ពួកគេនឹងត្រូវប្រឈមមុខតាមផ្លូវច្បាប់ រូបលោកបានទទួលព័ត៌មានពីប្រជាពលរដ្ឋរាយការណ៍ថា នគរបាលការពារព្រំដែនមួយចំនួន បានអនុវត្តខុសនឹងគោលការណ៍ច្បាប់ ដោយពួកគេទទួលយកប្រាក់ពីពលករខ្មែរឆ្លងដែន ទៅរកការងារធ្វើនៅប្រទេសថៃ ក្នុងម្នាក់២ពាន់រៀលទៅ៥ពាន់រៀល។
បើយោងតាមតាមរបាយការណ៍របស់ស្នងការដ្ឋាននគរបាលជាតិ ខេត្តបន្ទាយជ័យ បានឲ្យដឹងថា ក្នុងរយៈពេល៦ខែ ដើមឆ្នាំ ២០១៥នេះ ប្រជាពលរដ្ឋខ្មែរ ដែលចំណាកស្រុកទៅធ្វើការនៅប្រទេសថៃសរុប ៣៦៣២២នាក់ ក្នុងនោះពលករដែលទៅស្របច្បាប់ ៣១៥៧នាក់ និងមិនស្របច្បាប់ ៣៣១៦៥នាក់ ៕