លោក ហ៊ុន សែន បញ្ជាក់គោលជំហរ មិនចរចារជាមួយថ្នាក់ដឹកនាំគណបក្សសង្គ្រោះជាតិ ពីរឿងឃុំខ្លួនសកម្មជនទាំង១១នាក់
ក្នុងពិធីបុណ្យ ចម្រើនព្រះជន្ម ថ្វាយសម្តេចព្រះមហាសុមេធាធិបតីកិត្តិឧទ្ទេសបណ្ឌិត នន្ទ ង៉ែត នៅរសៀលថ្ងៃទី ២៧ កក្តដា ម្សិលមិញនេះ លោកនាយករដ្ឋមន្ត្រី ហ៊ុន សែន បានធ្វើការបដិសេធថា លោកមិននិយាយជាមួយថ្នាក់ដឹកនាំគណបក្សសង្គ្រោះជាតិ ពីរឿងឃុំខ្លួនសកម្មជនទាំង១១នាក់ របស់គណបក្សនេះឡើយ។
លោក ហ៊ុន សែន បញ្ជាក់ដូច្នេះថា រូបលោកគ្រាន់តែអាចផឹកទឹកតែនិងសួរសុខទុក្ខ ថ្នាក់ដឹកនាំគណបក្សសង្គ្រោះជាតិប៉ុណ្ណោះ តែបញ្ហាឃុំខ្លួនអ្នកទាំងនោះ ជាការសម្រេចរបស់តុលាការ មិនពាក់ព័ន្ធនឹងរូបលោកនោះទេ។ លោក ហ៊ុន សែន ក៏បានជុំរុញឲ្យ គណបក្សសង្គ្រោះជាតិ ប្ដឹងទៅសាលាឧទ្ធរណ៍ដើម្បីដោះស្រាយបញ្ហាសកម្មជនខ្លួន ដែលជាវិធីល្អជាងជួបចចារជាមួយរូបលោក ។
ប្រតិកម្មរបស់លោកនាយករដ្ឋមន្ត្រីបែបនេះ គឺបន្ទាប់ពីលោក កឹម សុខា អនុប្រធានទី១គណបក្សសង្គ្រោះជាតិ បានលើកហេតុផលថា គ្រាដែលសាលាដំបូងរាជធានីភ្នំពេញ សម្រេចសាលក្រមកាត់ទោសសកម្មជនទាំងនោះ គឺមិនមានវត្តមានមេធាវីរបស់ចុងចោទឡើយ។ លោក បន្ថែមថា កិច្ចព្រមព្រៀងកាលពីថ្ងៃទី២២ កក្កដា និងវប្បធម៌សន្ទនារវាងគណបក្សទាំងពីរ ក៏ជាមធ្យោបាយដែលអាចជួយដោះលែងសកម្មជនខ្លួនដែរ៕
