អគ្គមេបញ្ជាការរងកងយោធពលខេមរភូមិន្ទ និងជាតំណាងគណៈមេបញ្ជាការឯកភាព សមរភូមិប្រាសាទព្រះវិហារ ផ្កាយមាសបួន លោក ជា តារា បានអះអាងថា កងខេមរភូមិន្ទជាកងទ័ពរបស់គណបក្សប្រជាជនកម្ពុជា។ ការអះអាងរបស់លោក ជា តារា បានធ្វើឡើងក្នុងសិក្ខាសាលា ស្ដីពីសម្ព័ន្ធមេត្រីភាព រវាងអង្គភាពកងទ័ព កងកម្លាំងនគរបាលជាតិ ជាមួយស្ថាប័នអង្គភាពស៊ីវិល នាវិមានសន្តិភាព នៅថ្ងៃទី២៩ កក្កដា។
លោក ជា តារា ក៏ក្រើនរំលឹកដល់កងទ័ពទាំងអស់ត្រូវការពាររដ្ឋាភិបាល និងបង្ការកុំឲ្យមានបដិវត្តពណ៌ក្នុងប្រទេសកម្ពុជាឡើយ។ ការក្រើនរំលឹកនេះ ធ្វើឡើងបន្ទាប់ពីលោកនាយករដ្ឋមន្ត្រី ហ៊ុន សែន បានដាក់បញ្ជាដាច់ណាត់ដល់កងកម្លាំងប្រដាប់អាវុធគ្រប់ប្រភេទ ឲ្យកម្ចាត់ចោលបដិវត្តពណ៌ក្នុងប្រទេសកម្ពុជា។
ការអះអាងរបស់ លោក ជា តារា ដែលថាកងយោធពលខេមរភូមិន្ទ ជាកងទ័ពរបស់គណបក្សប្រជាជនកម្ពុជា ហាក់ផ្ទុយពីការលើកឡើងរបស់លោកនាយករដ្ឋមន្ត្រី ហ៊ុន សែន ដែកថ្លែងកាលពីថ្ងៃទី២៣ កក្កដា ថាកងកម្លាំងប្រដាប់អាវុធ គឺជាឧបករណ៍របស់រដ្ឋក្នុងកិច្ចការពារជាតិ ការពាររដ្ឋធម្មនុញ្ញ និងការពាររដ្ឋាភិបាលស្របច្បាប់។
ចំណែកមាត្រា២៣ នៃច្បាប់រដ្ឋធម្មនុញ្ញ បានចែងថា ព្រះមហាក្សត្រ ជាមេបញ្ជាការកំពូលនៃកងយោធពលខេមរភូមិន្ទ។ អគ្គមេបញ្ជាការកងយោធពលខេមរភូមិន្ទ ត្រូវបានតែងតាំងឡើងដើម្បីបញ្ជាកងយោធពលខេមរភូមិន្ទនេះ។ មាត្រា៧នៃច្បាប់នេះ ត្រង់វាក្យខ័ណ្ឌទី១ ចែងថាព្រះមហាក្សត្រកម្ពុជា ទ្រង់គ្រងរាជសម្បត្តិ ប៉ុន្តែទ្រង់មិនកាន់អំណាចឡើយ។ ប្រភពពីសារព័ត៌មានRFA