លោក យ៉ែម បុញ្ញារិទ្ធ តំណាងរាស្ត្រគណបក្សសង្គ្រោះជាតិ បានលើកឡើងថា ក្រុមដឹកនាំ បើនៅក្នុងផ្នត់គំនិតល្មោភអំណាច ល្មោភលុយ ធ្វើឲ្យមាន អយុត្តិធម៌សង្គម បូកផ្សំនឹងក្រុមបញ្ចើចបញ្ចើបញ្ជោរលើកជើងផង នាំឲ្យសង្គមច្របូលច្របល់ និងសង្គមវឹកវរ។ បើសង្គមសាសនា សង្គមយុវជន និស្សិតបញ្ញវន្ត គ្រូបង្រៀន និងសង្គមផ្សេងៗទៀត មានបញ្ហា តើប្រជាជាតិខ្មែរទៅជាយ៉ាងណា?។

តំណាងរាស្ត្ររូបនេះ បានបន្តទៀតថា សង្គមសាសនាមានតួនាទីសំខាន់ណាស់ ក្នុងការចូលរួមចំណែក លើកកម្ពស់សីលធម៌សង្គម អប់រំផ្លូវចិត្ត កុំឲ្យល្មោភអំណាច ល្មោភលុយ និងនិយាយខុសការពិត។ សង្គមយុវជន និស្សិតបញ្ញវន្ត គ្រូបង្រៀន ដែលស្រឡាញ់យុត្តិធម៌ សង្គម ភាពស្អាតស្អំ ភាពវាងវៃក្លាហាន ដល់ពេលមួយដែលសិស្ស ហ៊ានសួរ គ្រូហ៊ានឆ្លើយ ដោយសុចរិតភាព និងសច្ចៈភាព ពោលគឺ តថភាពពិតពីបញ្ហា និងសង្គម។ គ្មានអ្វីមួយធ្លាក់ពីលើមេឃមកទេ ឬគ្រាន់តែក្តក់ដៃវាកើតចេញមក នោះដែរពោលគឺយើងត្រូវ កំណត់គោលដៅជាក់លាក់ កំណត់ផែនការ យុទ្ធសាស្ត្រទៅឲ្យដល់គោលដៅ និងកំណត់មធ្យោបាយដើម្បីអនុវត្ត ផែនការឲ្យបានជោគជ័យ។