គណបក្ស ប្រជាជនកម្ពុជា និងគណបក្សសង្គ្រោះជាតិ បានចាត់មន្ត្រីចំនួន១រូប ទល់នឹង១រូប ដើម្បីធ្វើទំនាក់ទំនងគ្នាក្នុងកំរិតបឋមជាថ្មីម្ដង ទៀត មុននឹងឈានទៅកំណត់ថ្ងៃជួបគ្នាជាផ្លូវការឡើងវិញ។ លោក យ៉ែម បុញ្ញឬទ្ធិ បានឲ្យដឹងនៅរសៀលថ្ងៃព្រហស្បតិ៍នេះថា លោក គួយ ប៊ុនរឿន ត្រូវបានគណបក្សសង្គ្រោះជាតិ ចាត់ឲ្យធ្វើទំនាក់ទំនងជាមួយលោក ព្រំ សុខា មកពីគណបក្សប្រជាជនកម្ពុជា។ នេះបើយោងតាមគេហទំព័រថ្មីៗដែលបានចេញផ្សាយកាលពីថ្ងៃ០៦ កុម្ភះម្សិលម៉ិញ។
លោក គួយ ប៊ុនរឿន តំណាងរាស្ត្រគណបក្សសង្គ្រោះជាតិ កំពុងធ្វើទំនាក់ទំនងគ្នាជាមួយលោក ព្រំ សុខា រដ្ឋលេខាធិការក្រសួងមហាផ្ទៃមកពីគណបក្សប្រជាជនកម្ពុជា ដើម្បីស្វែងយល់ពីគោលបំណងគ្នាជាថ្មីម្ដងទៀត បន្ទាប់ពីគណបក្សជាប់ឆ្នោតទាំងពីរបានបែរខ្នងដាក់គ្នាមួយរយៈមកនោះ។ លោក យ៉ែម បុញ្ញឬទ្ធិ អ្នកនាំពាក្យគណបក្សសង្គ្រោះជាតិបានព្រលយឲ្យដឹងថា ទំនាក់ទំនងគ្នាជាថ្មីនេះ នឹងអាចឈានទៅដល់ការកំណត់ថ្ងៃជួបគ្នាផ្លូវការនាពេលខាងមុខ។ Â
លោក យ៉ែម បុញ្ញទ្ធិ បានសម្ដែងសុទិដ្ឋិនិយម ចំពោះការធ្វើទំនាក់ទំនងគ្នាជាថ្មីឡើងវិញនេះ ដោយអះអាងថា នឹងអាចបញ្ចប់ទំនាស់នយោបាយនៅកម្ពុជាក្នុងពេលដ៏ឆាប់ខាងមុខនេះ។ អ្នកនាំពាក្យរូបនេះបានបន្តអះអាងថា៖«យើងនឹងចូលសភា ប៉ុន្តែការជួបគ្នាវាជារឿងសំខាន់។ រាល់ការព្រមព្រៀង ត្រូវតែមានព្រះមហាក្សត្រជាសាក្សី ហើយយើនឹងចូលសភាដើម្បីដោះស្រាយវា»។ Â
លោក ព្រំ សុខា មិនអាចទាក់ទងសំការបញ្ជាក់បានទេ ដោយទូរសព្ទចូលតែគ្មានអ្នកទទួល។ ប៉ុន្តែយ៉ាងណាក៏ដោយ ព័ត៌មាននៃការទំនាក់ទំនងគ្នារវាងមន្ត្រីគណបក្សជាប់ឆ្នោតទាំងពីរ នេះ បានធ្វើឡើងបន្ទាប់ពីមានការអំពាវនាវជាបន្តបន្ទាប់ពីសំណាក់សហគមន៍ អន្តរជាតិ និងសង្គមស៊ីវីល។ កាលពីថ្ងៃពុធម្សិលមិញ មន្ត្រីរដ្ឋាភិបាលអាមេរិក បានទទួចឲ្យបក្សទាំងពីរវិលទៅរកការផ្សះផ្សាគ្នាដើម្បី បញ្ចប់ទំនាស់៕