ព្រះអង្គម្ចាស់ នរោត្តម រណឫទ្ធិ នឹងបង្កើតគណបក្សថ្មីមួយ ដែលមានឈ្មោះថា “សហគមន៍នៃគណបក្សអ្នករាជានិយម”
យោងតាមប្រធានខុទ្ទកាល័យរបស់ព្រះអង្គម្ចាស់ នរោត្តម រណឫទ្ធិ និងដែលត្រូវបានគេហទំព័រខេមប៊ូឌាដេលី ចុះផ្សាយនាថ្ងៃ២៥ កុម្ភះ ម្សិលម៉ិញបានឲ្យដឹងថា ព្រះអង្គម្ចាស់ នរោត្តម រណឫទ្ធិ ព្រះជន្ម៧០វស្សា ដែលធ្លាប់ជានាយករដ្ឋមន្ត្រីទី១នៃព្រះរាជាណាចក្រកម្ពុជា បន្ទាប់ពីមានការបោះឆ្នោតគាំទ្រដោយអង្គការសហប្រជាជាតិក្នុងឆ្នាំ១៩៩៣នោះ នឹងបង្កើតគណបក្សថ្មីមួយ និងចូលប្រឡូកក្នុងឆាកនយោបាយវិញ។
ប្រធានខុទ្ទកាល័យរូបនោះបានឲ្យដឹងទៀតថា គណបក្សនេះនឹងមានឈ្មោះថា សហគមន៍នៃគណបក្សអ្នករាជានិយម។ លោកបន្ថែមថា បំណងចូលប្រឡូកក្នុងនយោបាយវិញ ដោយសារ“បញ្ហាជាច្រើន” រវាងគណបក្សប្រជាជនកម្ពុជាដែលកំពុងកាន់អំណាច និងគណបក្សសង្គ្រោះជាតិ ចាប់តាំងពីការបោះឆ្នោតជ្រើសតាំងតំណាងរាស្ត្រកាលពីក្នុងខែកក្កដា។
ព្រះអង្គម្ចាស់ នរោត្តម រណឫទ្ធិ បានចាកចេញពីតំណែងជាប្រធានគណបក្សហ៊្វុនស៊ីនប៉ិច កាលពីឆ្នាំ២០០៦ ហើយបានបន្តបង្កើតគណបក្សនរោត្តម រណឫទ្ធិ ដែលទទួលបានពីរអាសនៈនៅក្នុងរដ្ឋសភាអំឡុងព្រឹតិ្តការណ៍បោះឆ្នោតជ្រើសតាំងតំណាងរាស្រ្តឆ្នាំ២០០៨។
គណបក្ស នរោត្តម រណឫទ្ធិ បានឈប់ធ្វើសកម្មភាពមុនព្រឹតិ្តការណ៍បោះឆ្នោតជ្រើសតាំងតំណាងរាស្ត្រលើកចុងក្រោយ។ព្រះអង្គម្ចាស់ នរោត្តម រណឫទ្ធិ បច្ចុប្បន្នកំពុងបំពេញតួនាទីជាទីប្រឹក្សារបស់ព្រះមហាក្សត្រ នរោត្តម សីហមុនី នៃព្រះរាជាណាចក្រកម្ពុជា៕
សម្តេចក្រុមព្រះ នរោត្តម រណឫទ្ធិ (រូបថតឯកសារ) ©សុវណ្ណារ៉ា