រដ្ឋាភិបាលគ្មានគម្រោងបិទបណ្ដាញសង្គមអ៊ីនធឺណិតទេ
នៅក្នុងសន្និបាតប្រចាំឆ្នាំរបស់ក្រសួងព័ត៌មានធ្វើឡើងនា ក្រសួងព័ត៌មាន នៅថ្ងៃទី២៦ កុម្ភៈ រដ្ឋមន្ត្រីក្រសួងព័ត៌មាន លោក ខៀវ កាញារីទ្ធ ឲ្យដឹងថា អ្នកប្រើប្រាស់បណ្ដាញព័ត៌មានទំនាក់សង្គមតាមប្រព័ន្ធអេឡិចត្រូនិក ដូចជាហ្វេសប៊ុក (Facebook) ថ្វីតធឺ (Twitter) ជាដើម មានសេរីភាពបរិបូរណ៍ក្នុងការបង្កើតនិងប្រើប្រាស់បណ្ដាញទំនាក់ទំនង ទាំងនេះនៅកម្ពុជា។
យោងតាមគេហទំព័វិទ្យុអាស៊ីសេរីចេញផ្សាយនាថ្ងៃទី២៦ កុម្ភះ បានដកស្រង់សំដីលោកខៀវ កាញារីទ្ធ ថាបើទោះបីជាអ្នកប្រើប្រាស់បណ្ដាញព័ត៌មានទំនាក់សង្គមទាំងនោះបានប្រើប្រាស់ ក្នុងន័យវិជ្ជមានផងនិងអវិជ្ជមានផងយ៉ាងណា លោករដ្ឋមន្ត្រីសន្យាថា ក្រសួងព័ត៌មាននឹងមិនបិទបណ្ដាញព័ត៌មានទំនាក់សង្គមទាំងនោះទេ។
របាយការណ៍សរុបប្រចាំឆ្នាំរបស់ក្រសួងព័ត៌មាន មិនមានបញ្ជាក់អំពីចំនួនអ្នកនិយមប្រើបណ្ដាញទំនាក់ទំនងសង្គមទេ ប៉ុន្តែបានឲ្យដឹងថា ក្នុងឆ្នាំ២០១៣ កន្លងមកនេះ អង្គភាពកាសែតមានចំនួនចំនួន១៣៩ អង្គភាពទស្សនាវដី្តមានចំនួន៥៦ ស្ថានីយទូរទស្សន៍នៅទីក្រុងភ្នំពេញមាន១៦ និងស្ថានីយផ្សាយបន្តតាមខេត្តមាន៧០ ហើយចំពោះស្ថានីយវិទ្យុនៅភ្នំពេញមាន៦៩ និងនៅតាមខេត្តមានចំនួន ១១៩ស្ថានីយ៕
សន្និបាតប្រចាំឆ្នាំរបស់ក្រសួងព័ត៌មាន នៅថ្ងៃទី២៦ កុម្ភៈ ឆ្នាំ២០១៤ RFA/Keo Nimol