សមាជិកព្រឹទ្ធសភា គណបក្សប្រជាជនកម្ពុជា ប្រតិកម្មតបនឹងសមាជិកព្រឹទ្ធសភា គណបក្សសមរង្ស៊ី
នៅថ្ងៃទី ១៧ ខែមិនា ឆ្នាំ២០១៤នេះ សមាជិកព្រឹទ្ធសភា នៃគណបក្សប្រជាជនកម្ពុជា បានចេញសេចក្ដីថ្លែងការណ៍ឆ្លើយតបភ្លាមៗចំពោះសមាជិកព្រឹទ្ធសភា គណបក្សសមរង្ស៊ី។ លិខិតមួយច្បាប់ នោះបានឲ្យដឹងថា គណបក្សប្រជាជនកម្ពុជា សោកស្ដាយយ៉ាងខ្លាំង ចំពោះលិខិតថ្កោលទោស ចោទប្រកាន់របស់ សមាជិកសភា នៃគណបក្សសម រង្ស៊ី ដែលចេញផ្សាយកាលពីថ្ងៃទី ១៧ ខែមិនា ឆ្នាំ២០១៤ ថាគណបក្សប្រជាជនកម្ពុជា បានរំលោភនូវ ច្បាប់រដ្ឋធម្មនុញ មាត្រា ៤១ ដែលអនុញ្ញាតឲ្យប្រជាពលរដ្ឋមានសិទ្ធិបញ្ចេញមតិ និងសេរីភាពជួបប្រជុំ ដែលជាទង្វើផ្ទុយទាំងស្រុងពីគោលការណ៍លទ្ធិប្រជាធិតេយ្យ។
សេចក្ដីថ្លែងតបនេះបន្ដថា ការចោទប្រកាន់របស់សមាជិកព្រឹទ្ធសភារបស់គណបក្សប្រឆាំង មកលើគណបក្សប្រជាជនកម្ពុជា ថាធ្វើឡើងដោយគ្មានមូលដ្ឋានការពិត ហើយដែលសមាជិកព្រឹទ្ធសភា ខាងគណបក្សប្រជាជនកម្ពុជា មិនអាចទទួលយកបានឡើយ ដោយបានបញ្ជាក់ថា គណបក្សរបស់ខ្លួន តែងបានគោរពយ៉ាង ខ្ជាប់ខ្ជួននូវរដ្ឋធម្មនុញ្ញ និងច្បាប់នានាដែលក្នុងនោះមានទាំងសេរីភាពខាងការបញេ្ចញមតិរបស់ប្រជាពលរដ្ឋដែលបានប្រព្រឹត្តទៅស្របតាមច្បាប់ជាធរមាន។
គួររំលឹកផងដែលថា កាលពីថ្ងៃទី១៥ មីនា ២០១៤ បេក្ខជនជាប់ឆ្នោតគណបក្សសង្គ្រោះជាតិ និងសមាជិកព្រឹទ្ធសភា គណបក្សសមរង្ស៊ី បានរៀបចំវេទិកាសំណោះសំណាល ជាមួយអ្នកគាំទ្រ នៅស្រុកត្រាំកក់ និង ស្រុកសំរោង ខេត្តតាកែវ។ ប៉ុន្តែវេទិកាសាធារណៈ រងការរខានពីភាគីម្ខាងទៀត ដែលគណបក្សនេះបាន អះអាងថាជាការរៀបចំរបស់គណបក្សប្រជាជនកម្ពុជា។
