បើតាមសារអេឡិចត្រូនិចពីការិយាល័យរបស់រដ្ឋមន្រ្តីការបរទេស អូស្រ្តាលី ផ្ញើមកវិទ្យុអូស្រ្តាលីនៅថ្ងៃម្សិលមិញ លោកស្រី Julie Bishop បញ្ជាក់ថា ក្នុងអំឡុងទស្សនកិច្ចរបស់លោកស្រីនៅកម្ពុជាកាលពីខែមុននោះ លោកស្រីបានពិភាក្សាអំពីកំណែទម្រង់ការបោះឆ្នោតដែរជាមួយលោកសម រង្ស៊ី។ ហើយនៅថ្ងៃពុធកន្លងទៅនេះលោកស្រីបានរៀបចំឲ្យលោកសមរង្ស៊ី ជួបជាមួយលេខាធិការរដ្ឋសភាទទួលបន្ទុកកិច្ចការបរទេស គឺលោក Brett Mason ជាសមាជិកព្រឹទ្ធសភាដោយសារលោកស្រីមិនអាចចូលរួមបានតាមការណាត់។ លោកស្រីរដ្ឋមន្រ្តីការបរទេសអូស្រ្តាលីបាន ទូរសព្ទទៅជួបលោកសមរង្ស៊ីកាលពីយប់ថ្ងៃពុធនោះដែរ ដើម្បីបញ្ជាក់អំពីការគាំទ្ររបស់ប្រទេសអូស្រ្តាលីចំពោះកំណែ ទម្រង់បោះឆ្នោត និងការសន្ទនាគ្នាជានិរន្តរ៍រវាងរដ្ឋាភិបាលកម្ពុជានិងគណបក្ស ប្រឆាំង។
លោកស្រី Julie Bishop កាល ពីថ្ងៃទី២១ខែកុម្ភៈកន្លងទៅនេះ បានធ្វើទស្សនកិច្ចរយៈពេលពីរថ្ងៃនៅកម្ពជា។ ក្នុងដំណើរទស្សនកិច្ចនោះលោកស្រីបានធ្វើការចរចាជាមួយកម្ពុជា ពាក់ព័ន្ធនឹងជនស្វែងសុំសិទ្ធិជ្រកកោនដែលប៉ុនប៉ងចូលទៅ អូស្រ្តាលីតាម កាណូត។ នៅគ្រានោះលោកស្រីបានរងការទិតៀនពីមជ្ឈដ្ឋានមួយចំនួនថា លោកស្រីមិនបានយកចិត្តទុកដាក់ស៊ីជម្រៅក្នុងការជួយ អន្តរាគមន៍ទៅលើកង្វល់ស្ថានភាពនយោបាយនៅកម្ពុជា។ ប្រភពពីគេហទំព័រអេប៊ីស៊ីអូស្រ្តាលីចេញផ្សាយនាព្រឹកថ្ងៃទី២១ មីនា ឆ្នាំ២០១៤។