ចក្រភពអង់គ្លេសគាំទ្រឲ្យគណបក្សប្រជាជនកម្ពុជា (CPP) និងគណបក្សសង្គ្រោះជាតិ (CNRP) បន្តជួបពិភាក្សាគ្នាជាបន្តទៀត និងឲ្យមានការចូលប្រជុំដោះស្រាយបញ្ហាផ្សេងៗនៅក្នុងសភាជាតិ។
ការបញ្ជាក់ពីជំហរនេះ បានបង្ហាញឡើងនៅក្នុងជំនួបរវាងលោកឧបនាយករដ្ឋមន្ត្រី ហោ ណាំហុង រដ្ឋមន្ត្រីក្រសួង ការបរទេសកម្ពុជា ជាមួយលោក William Jesse Longhurst ឯកអគ្គរាជទូតអង់គ្លេសតែងតាំង ថ្មីប្រចាំកម្ពុជា កាលពីព្រឹកថ្ងៃទី២៨ ខែមីនានៅទីស្ត្រីការក្រសួង។
យោងតាមប្រភពពីគេហទំព័រសម្លេងសារព័ត៌មានសេរីបានឲ្យដឹងថា លោកក កុយគួង អ្នកនាំពាក្យក្រសួងការបរទេសកម្ពុជាបានប្រាប់ក្រុមអ្នកកាសែត បន្ទាប់ពីជំនួបចប់ថា នៅក្នុងជំនួបនោះលោកឧបនាយករដ្ឋមន្ត្រីបានលើកឡើងនូវស្ថានភាពនយោបាយ នៅកម្ពុជាពីមុនបោះឆ្នោតរហូតដល់ក្រោយការបោះឆ្នោត។ ដោយលោកបានលើកឡើងថា ទោះបីជាយ៉ាងណាក៏ដោយក្នុងការកំណែទម្រង់ផ្សេងៗ រាជរដ្ឋាភិបាលកម្ពុជាតែងតែធ្វើជាបណ្តើរៗ។ លោកបានបញ្ជាក់ថា ការកែទម្រង់ផ្សេងៗត្រូវការឲ្យមានការប្រជុំនៅសភា ពីព្រោះការកែទម្រង់ផ្សេងៗ ត្រូវតែមានវិសោធនកម្មទៅលើច្បាប់ ទៅលើរដ្ឋធម្មនុញ្ញ ដូច្នេះហើយមិនអាចដោះស្រាយនៅតាមផ្លូវបានទេ។