កាលពីថ្ងៃទី២៧ ខែមិនា ២០១៤ ព្រះមហាក្សត្រនៃព្រះរាជាណាចក្រកម្ពុជា ព្រះបាទ នរោត្តម សីហមុនី បានចេញព្រះរាជសារមួយច្បាប់ ក្នុងឱកាសបើកបវេសនកាល នៃរដ្ឋសភាសម័យប្រជុំរដ្ឋសភាលើកទី ២ នីតិកាល ទី៥។ ក្នុងព្រះរាជសារនោះព្រះអង្គសង្ឃឹមថា ក្នុងនីតិកាលទី៥នេះ រដ្ឋសភានឹងអនុម័តដែលបម្រើដល់វិស័យយុត្តិធម៍ ដែលច្បាប់ទាំងនោះមានដូចជា៖ ច្បាប់ស្តីពីការចាត់តាំងតុលាការ និងអយ្យការ និងច្បាប់ស្តីពី លក្ខន្តិកៈរបស់ចៅក្រម និងព្រះរាជអាជ្ញា ជាដើម។
ប៉ុន្តែ ដោយសារតែដំណើរការប្រជុំសភា ដើម្បីអនុម័តច្បាប់ដែលមានតែសមាជិកតំណាងរាស្ត្រ គណបក្សប្រជាជនកម្ពុជា មជ្ឈមណ្ឌលសិទ្ធិមនុស្សកម្ពុជា CCHR កាលពីថ្ងែអង្គារ៍ម្សិលមិញ បានអំពាវនាវឲ្យរដ្ឋសភា ផ្អាកការអនុម័តច្បាប់ថ្មីទាំងឡាយ រហូតដល់បញ្ហាជាប់គាំងនយោបាយត្រូវបានដោះស្រាយ។ CCHR ព្រួយបារម្ភថា សេចក្តីព្រាងច្បាប់ដែលសភាកំពុងធ្វើការអនុម័ត មិនត្រូវបាន ពិនិត្យពិច័យ គ្រប់គ្រាន់ និងមិនបានឆ្លុះបញ្ចាំងពីឆន្ទៈប្រជាពលរដ្ឋ ព្រោះការប្រជុំអនុម័តនោះមានតែតំណាងរាស្ត្រ មកពីគណបក្ស ប្រជាជនកម្ពុជាតែម្ខាង។
សូមបញ្ជាក់ថា សម័យប្រជុំរដ្ឋសភាលើកទី២ នីតិកាលទី៥ ចាប់ផ្តើមដំណើរការ ពីថ្ងៃទី០១ ខែមេសានេះដើម្បីអនុម័តសេចក្តីព្រាងច្បាប់មួយចំនួន។