លោក កឹម សុខា អនុប្រធានគណបក្សសង្រ្គោះជាតិ បានប្រកាសថា គណបក្សសង្រ្គោះជាតិ នៅមានសមរភូមិ ចំនួន ៣ទៀត ដើម្បីដោះស្រាយបញ្ហា នយោបាយ ជាមួយ គណបក្សប្រជាជនកម្ពុជា (បក្ស កាន់អំណាច)។

តាមវីដេអូឃ្លីប ដាក់បង្ហោះលើទំព័រFacebook របស់លោក កឹម សុខា បានថ្លែងថា សមរភូមិទាំង៣នោះ រួមមាន៖ ទី១. កម្លាំងមហាជន ដែលកម្លាំងមហា ជននេះ គឺសំដៅដល់ការធ្វើ មហាបាតុកម្ម ដើម្បីទាមទារ  ទី២. នយោបាយការទូត នយោបាយការទូតនេះ ត្រូវលោក កឹម សុខា បានបញ្ជាក់ ថា នឹងប្រើយុទ្ធនាការអំពាវនាវ និងជំរុញឲ្យបណ្តាប្រទេសនានា មិនឲ្យទទួលស្គាល់រាជរដ្ឋាភិបាលកម្ពុជាបច្ចុប្បន្ន  និងទី៣. ប្រព័ន្ធច្បាប់អន្តរជាតិ យន្តការប្រព័ន្ធច្បាប់អន្តរជាតិ គឺលោក កឹម សុខា សំដៅប្រើច្បាប់នានា ដែលបាន ធ្វើឡើង ក្នុងកិច្ចចរចាទីក្រុងប៉ារីស និងតុលាការអន្តរជាតិជាដើម។

អនុប្រធានគណបក្សសង្រ្គោះជាតិរូបនេះ បានប្រកាសសម្តែងក្តីរំពឹងថា សមរភូមិ ដែលខ្លួនដាក់ចេញនឹងទទួលជ័យ ជម្នះប្រសិន បើជំហរគណបក្ស របស់ខ្លួននៅតែរឹងមាំ មិនបែកបាក់គ្នាទេនោះ។
ដកស្រង់ពីគេហទំព័រសម្លេងសាព័រមានសេរី ដែលបានចេញផ្សាយនាថ្ងៃទី២២ មេសា ឆ្នាំ២០១៤។