គេហទំព័របស់សាលារាជធានីភ្នំពេញ ឲ្យដឹងថា លោក ប៉ា សុជាតិវង្ស បានណែនាំឲ្យអាជ្ញាធរខណ្ឌទាំង៩ ត្រៀមកម្លាំងសណ្តាប់ធ្នាប់ ៥០០នាក់ ក្នុងមួយខណ្ឌៗ ដើម្បីចូលរួមពង្រឹងសន្តិសុខ សណ្ដាប់ធ្នាប់ក្នុងមូលដ្ឋានខណ្ឌរៀងៗខ្លួន ដោយយកកម្លាំងនគរបាល និងកងរាជអាវុធហត្ថជាស្នូល សម្រាប់បម្រើដល់យុទ្ធនាការឃោសនាបោះឆ្នោត ក្រុមប្រឹក្សារាជធានី ខេត្ត ក្រុង ស្រុក ខណ្ឌ។ លោកថ្លែងបែបនេះនៅក្នុងកិច្ចប្រជុំ គណៈបញ្ជាការរៀបចំផែនការពង្រឹង សន្តិសុខ ក្នុងឱកាសឃោសនាបោះឆ្នោតក្រុមប្រឹក្សា កាលពីថ្ងៃអង្គារម្សិលម៉ិញនេះ។

លោកបន្តថា ចាប់ពីថ្ងៃទី ០១ ខែ ឧសភា ឆ្នាំ ២០១៤ នេះតទៅ រាល់ការជួបជុំប្រមូលផ្តុំណាមួយតាមដងផ្លូវ ឬទីសាធារណៈ នឹងត្រូវបានហាមឃាត់ លើកលែងតែនៅតាមទីស្នាក់ការ និងទីតាំងឯកជននានា ។

លោក ក៏បានបញ្ជាក់ថា អាជ្ញាធមានសមត្ថកិច្ច ក៏ត្រូវពង្រឹងសន្តិសុខ សណ្តាប់ធ្នាប់តាមច្រកចេញចូលរាជធានីភ្នំពេញ និងធ្វើការត្រូតពិនិត្យ រដ្ឋបាលឲ្យបានជាប់ជាប្រចាំចាប់ពីថ្ងៃទី៣០ ខែ មេសា នេះតទៅ។
ការឃោសនាបោះឆ្នោត នឹងចាប់ផ្តើមពីថ្ងៃទី ០២ ដល់ថ្ងៃទី១៦ ខែ ឧសភា ឆ្នាំ ២០១៤ និងការបោះឆ្នោតនៅថ្ងៃទី១៨ ខែ ឧសភា ឆ្នាំ ២០១៤ ។