កិច្ចប្រជុំសភាឯកបក្សជជែកពិភាក្សាប្រធានបទក្រៅពីរបៀបវារៈដែលបានគ្រោងទុក
យោងតាមសេចក្តីប្រកាសព័ត៌មានរបស់អគ្គលេខាធិការដ្ឋាននៃរដ្ឋសភា កាលពីថ្ងៃទី០៧ ឧសភា ២០១៤ របៀបវារៈចំនួន ០៧ ត្រូវបានគេរំពឹងថានឹងពិភាក្សានៅក្នុងកិច្ចប្រជុំពេញអង្គនៃរដ្ឋសភា នៅថ្ងៃទី ២០ ខែឧសភា ២០១៤ ដែលក្នុងនោះមានការពិភាក្សា និងអនុម័តច្បាប់ចំនួន០៣ ពាក់ព័ន្ធនឹងវិស័យយុត្តិធម៌ផងដែរ។
ខុមហ្វ្រែលបានចូលរួមសង្កេតពីដំណើរប្រជុំពេញអង្គនៃរដ្ឋសភាដែលរងការរិះគន់ថាជារដ្ឋសភាឯកបក្ស។ កិច្ចប្រជុំពេញអង្គ នាព្រឹកមិញនេះ មានកូរ៉ុមចំនួន ៦៥ រូបមកពីគណបក្សប្រជាជនកម្ពុជា។ តំណាងរាស្ត្រដែលមានវត្តមាននៅក្នុងកិច្ចប្រជុំនេះត្រូវបានផ្តល់ឱកាសឲ្យឡើងសំដែងមតិរៀងៗខ្លួន។ តាមការសង្កេតគេឃើញថាតំណាងរាស្ត្រមកពីគណបក្សប្រជាជនកម្ពុជាស្ទើរតែមិនជជែកពិភាក្សាជុំវិញរបៀបវារៈដែលបានគ្រោងទុក ប៉ុន្តែបែរជាយកកិច្ចប្រជុំនេះលើកឡើងពីសកម្មភាពរបស់គណបក្សខ្លួន និងវាយប្រហារចំពោះភាគីផ្សេងៗទៅវិញ ។
លោក ជាម យៀប អ្នកតំណាងរាស្រ្ត មកពីគណបក្សប្រជាជនកម្ពុជា មណ្ឌលព្រៃវែង បានចំណាយពេលជាច្រើននាទី លើកឡើងអំពីលទ្ធផលនៃការបោះឆ្នោតក្រុមប្រឹក្សាអាណត្តិទី២ របស់គណបក្សប្រជាជនកម្ពុជា ដោយលោកបានថ្លែងអំណរគុណចំពោះអង្គបោះឆ្នោតដែលបានបោះឆ្នោតគាំទ្រគណបក្សខ្លួន។ បន្ថែមលើសពីនេះទៀត លោកក៏បានធ្វើការរិះគន់ដល់អង្គការសង្គមស៊ីវិលនានាផងដែរ។ លោកបានរិះគន់ថា អង្គការសង្គមស៊ីវិលបាននឹងកំពុងជ្រៀតជ្រែកការងារផ្ទៃ ក្នុងរដ្ឋសភា ដោយសារពួកគេតែងតែធ្វើការរិះគន់ និងស្នើសុំឲ្យរដ្ឋសភាផ្អាកកិច្ចប្រជុំរបស់ខ្លួន។
“ខ្ញុំសូមអនុញ្ញាតពីអង្គប្រជុំរដ្ឋសភាដើម្បីជម្រាបនូវទស្សនៈផ្ទាល់របស់ខ្ញុំ ក្នុងនាមជាអ្នកតំណាងរាស្រ្តគណបក្សប្រជាជនកម្ពុជា សូមសំដែងការអបអរសារទរ និងថ្លែងអំណរគុណយ៉ាងជ្រាលជ្រៅចំពោះប្រជាជនកម្ពុជា ក៏ដូចជាអង្គបោះឆ្នោត ក្រោយពីទទួលរបាយការណ៍បឋមរបស់ គ.ជ.ប គឺគណបក្សប្រជាជកម្ពុជាគឺជាគណបក្សឈានមុខលើសលុបក្នុងចំណោមគណបក្សទាំង ៥” លោកបានបន្តថា “កម្ពុជាបច្ចុប្បន្ននេះអត់មានជាប់គាំងនយោបាយនោះទេ... សូមសាធារណៈជនមេត្តាជ្រាបកុំទៅតាមមនុស្សមួយចំនួនដែលតែងតែបំផ្លាញកិត្តិយសគណបក្សប្រជាជនកម្ពុជា ដែលតែតែលើកឡើងថាកម្ពុជាបច្ចុប្បន្នកំពុងជាប់គាំងនយោបាយ សូម បដិសេធដាច់ខាត”
ក្រៅពីធ្វើការរិះគន់ចំពោះអង្គការសង្គមស៊ីវិល អ្នកតំណាងរាស្ត្រ និងជាមន្ត្រីជាន់ខ្ពស់នៃគណបក្សកាន់អំណាចរូបនេះ ក៏បានធ្វើការវាយប្រហារលើតំណាងអង្គការសហប្រជាតិទទួលបន្ទុកសិទ្ធិមនុស្សនៅកម្ពុជាផងដែរ ដោយលោកបាននិយាយថា លោកមានការសោកស្តាយដែលតំណាងអង្គការសហប្រជាជាតិមួយនេះ តែងតែធ្វើការវាយតម្លៃកម្ពុជាខុសពីការពិត ។ ក្រៅពីនោះ លោកក៏បានធ្វើការវាយប្រហារលើលោក សម រង្ស៊ី និងលោក កឹម សុខា ដែលមិនព្រមចូលមកក្នុងរដ្ឋសភាដើម្បីធ្វើការដោះស្រាយបញ្ហានោះទេ តែបែរជាដឹកនាំប្រជាពលរដ្ឋធ្វើបាតុកម្មទៅវិញ។
ចំណែកឯ លោកស្រី ឡោក ខេង អ្នកតំណាងរាស្រ្តមួយរូបមកពីគណបក្សប្រជនកម្ពុជា ក៏បាននិយាយ ធ្វើការរិះគន់ផងដែរ អ្នកដែលតែងតែនិយាយថារដ្ឋសភាគឺជារដ្ឋសភាឯកបក្ស និងរាជរដ្ឋាភិបាលមិនស្របច្បាប់។ លោកស្រីចាត់ទុកការលើកឡើងដូចនេះគឺមិនត្រឹមត្រូវ។
លោក ឡុង វិសាឡូ ជារដ្ឋមន្រ្តីស្តីទីក្រសួងការបរទេស និងជាតំណាងរដ្ឋាភិបាលដើម្បីការពារច្បាប់នៅថ្ងៃនេះ បានសំដែងការអរគុណចំពោះតំណាងរាស្ត្រ និងជូនពរឲ្យសមាជិកសភាប្រកបជ័យជំនះក្នុងការងារគណបក្សទៅវិញ “ខ្ញុំសូមជូនពរដល់អង្គសភាទាំងមូល និងសមជិករដ្ឋសភាទាំងអស់ សូមប្រកបដោយ ជ័យជំនះគ្រប់បែបយ៉ាងទាំងអស់ ដើម្បីបំរើគណបក្ស”។
កិច្ចប្រជុំសភាពេញអង្គនេះ នឹងបន្តកិច្ចប្រជុំរបស់ខ្លួន នៅព្រឹកថ្ងៃទី២១ ខែឧសភា ២០១៤ បន្តទៀត ដែលពិភាក្សាលើរបៀបវារៈនៅសេសសល់។
