ឈាង វុន ស្នើដល់រដ្ឋមន្រ្តីក្រសួងព័ត៌មាន និងក្រសួងប្រៃសណីយ៍ ឲ្យពិនិត្យពីលទ្ធភាពវិធានការច្បាប់ចំពោះការមាក់ងាយរដ្ឋសភា និងរដ្ឋាភិបាល
លោក ឈាង វុន អ្នកតំណាងរាស្រ្តមកពីគណបក្សប្រជាជនកម្ពុជា មណ្ឌលបាត់ដំបង បានស្នើដល់រដ្ឋមន្រ្តីក្រសួងព័ត៌មាន ឲ្យពិនិត្យលើផ្លូវច្បាប់ ថាតើការប្រើប្រាស់ពាក្យមើលងាយលើស្ថាប័នរដ្ឋសភា និងស្ថាប័នរដ្ឋាភិបាល តាមរយៈប្រព័ន្ធផ្សព្វផ្សាយ មានទោសដែរឬទេ? និងឲ្យក្រសួងនេះធ្វើការសហការជាមួយប្រៃសណីយ៍ ដើម្បីពិនិត្យ និងគ្រប់គ្រងប្រព័ន្ធផ្សព្វផ្សាយ និងបច្ចេកទេសនៃការផ្សព្វផ្សាយទាំងអស់ រួមទាំងប្រព័ន្ធផ្សព្វផ្សាយសង្គមដ៏មានប្រជាប្រិយភាព គឺហ្វេសប៊ុក (facebok) ផងដែរ។
ការថ្លែងដូចនេះធ្វើឡើងនៅក្នុងពេលកិច្ចប្រជុំពេញអង្គនៃរដ្ឋសភា កាលពីព្រឹកថ្ងៃទី២២ ខែឧសភា ឆ្នាំ២០១៤ នេះ ដើម្បីធ្វើការអនុម័តច្បាប់ស្តីពីវិស័យតុលាការ។ លោក ឈាង វុន បានថ្លែងថា “រដ្ឋសភាគឺជាអង្គការនីតិបញ្ញត្តិកំពូលមួយក្នុងចំណោមអំណាចទាំង ៣ របស់រដ្ឋ ត្រូវឲ្យអ្នកសារព័ត៌មានកំប៉ិចកំប៉ុកផ្សព្វផ្សាយប្រើពាក្យសំដីត្រគោះបោះបោកលើរដ្ឋសភាផ្តេសផ្តាស យើងលឺអស់ហើយ រដ្ឋសភាឯកបក្សក៏មាន រដ្ឋសភាគូថមាន់ក៏មាន.....ប្រព័ន្ធហ្វេសប៊ុក ផ្សព្វផ្សាយរញ៉េរញ៉ៃច្រើនណាស់យករហូតដល់រូបនាយករដ្ឋមន្រ្តី យករូបឆ្កែមកដាក់លើក្បាលគាត់”។
ពាក់ព័ន្ធនឹងការរិះគន់របស់តំណាងរាស្ត្ររូបនេះលើការប្រើពាក្យរដ្ឋសភាឯកបក្ស បើសិក្សាលើរដ្ឋធម្មនុញ្ញ កម្ពុជាប្រកាន់យករបបនយោបាយបែបសភានិយម និងប្រកាន់យកគោលការណ៍សេរីពហុ បក្ស ប៉ុន្តែរដ្ឋសភានាពេលបច្ចុប្បន្នគឺមានតំណាងរាស្ត្រនៃគណបក្សតែមួយប៉ុណ្ណោះគឺ គណបក្សប្រជាជនកម្ពុជា។ ក្រោមហេតុផលខាងលើ ទើបរដ្ឋសភារងការរិះគន់បែបនេះជាបន្តបន្ទាប់។
គួររំលឹកផងដែរថា លោកនាយករដ្ឋមន្ត្រី ហ៊ុន សែន ធ្លាប់ថ្លែងក្នុងកិច្ចប្រជុំគណៈរដ្ឋមន្ត្រី ថារដ្ឋាភិបាល គ្មានគម្រោងហាមឃាត់ប្រព័ន្ធផ្សព្វផ្សាយសង្គមនោះទេ ថែមទាំងលើកទឹកចិត្តឲ្យមានការប្រើប្រាស់កាន់ តែទូលំទូលាយថែមទៀត ហើយ លោក ខៀវ កាញារីទ្ធ រដ្ឋមន្រ្តីក្រសួងព័ត៌មានធ្លាប់បានអះអាងនាពេលកន្លងមកដូចគ្នាថាក្រសួងមិនមានគម្រោងបិទប្រព័ន្ធហ្វេសប៊ុកនោះទេ។
