កិត្ដិសេដ្ឋាបណ្ឌិត គាត ឈន់៖ ទោះបីមកពីគណបក្សនយោបាយណាក៏ដោយ ក្រុមប្រឹក្សាត្រូវខិតខំយកចិត្ដទុកដាក់ចំពោះសុខទុក្ខប្រជាពលរដ្ឋ
យោងតាមគេហទំព័រនគរវត្តដែលបានចេញផ្សាយកាលពីម្សិលម៉ិញបានដកស្រង់សំដី លោក កិត្ដិសេដ្ឋាបណ្ឌិត គាត ឈន់ ឧបនាយករដ្ឋមន្ដ្រីប្រចាំការ ដែលបានលើកឡើងនៅក្នុងពិធីប្រកាសចូលកាន់តំណែង ក្រុមប្រឹក្សារាជធានី ភ្នំពេញអាណត្ដិទី២ កាលពីព្រឹកថ្ងៃទី៥ ខែមិថុនា ឆ្នាំ២០១៤ នៅសាលារាជធានីភ្នំពេញនេះថា ក្នុង នាមសមាជិកក្រុមប្រឹក្សាដែលជាប់ ឆ្នោតទាំងអស់ទោះមានសមាសភាព មកពីគណបក្សនយោបាយផ្សេងៗគ្នាក៏ ដោយក៏ត្រូវខិតខំបម្រើផលប្រយោជន៍ និងសេចក្ដីត្រូវការរបស់ប្រជាពលរដ្ឋ ទាំងអស់ដោយស្មើភាព ហើយមិនត្រូវ ប្រកាន់និន្នាការនយោបាយរើសអើងនោះឡើយ ។ ពិសេស ផ្ដល់សេវាសាធារណៈតាមរយៈរដ្ឋបាល នានាជូនពួកគាត់ឱ្យកាន់តែប្រសើរជាងមុនប្រកបដោយតម្លាភាពនិងគ្មាន អំពើពុករលួយ ។ នេះបើយោងតាមគេហទំព័រនគរវត្តដែលបានចេញផ្សាយកាលពីម្សិលម៉ិញ។
គេហទំព័រដដែលបានដកស្រង់បន្តថា លោកបានបញ្ជាក់ ការអំពាវនាវដូច្នេះ គឺក្នុងគោលបំណងដើម្បីឱ្យសមាជិកក្រុម ប្រឹក្សាទាំងនោះបានអនុវត្ដស្របតាមផ្លូវច្បាប់ ព្រោះអស់លោកជាអ្នកតំណាងឱ្យ ប្រជាពលរដ្ឋដែលមានភារកិច្ចសំខាន់ ត្រូវធ្វើយ៉ាងណាឱ្យប្រជាពលរដ្ឋក្នុងមូលដ្ឋានធានាបានការរស់នៅកាន់តែ ប្រសើរ ទាំងជីវភាព សន្ដិសុខ និងសណ្ដាប់ធ្នាប់។ លោកបន្ដថា ចាប់ពីពេលនេះទៅការ ផ្ដល់សេវារដ្ឋបាលនានាជូនប្រជាពលរដ្ឋ ត្រូវពង្រឹងគុណភាព និងមានតម្លាភាព ជួយទប់ស្កាត់ឱ្យបានរាល់អំពើពុករលួយ គ្រប់រូបភាពដែលនេះជាយន្ដការមួយ ជួយជំរុញដល់ការកាត់បន្ថយភាពក្រីក្រនិងការអភិវឌ្ឍកម្ពុជាកាន់តែ រីកចម្រើន ទៅមុខ ពិសេសគ្មានភាពថ្នាំងថ្នាក់រវាង ប្រជាពលរដ្ឋដែលម្ចាស់ឆ្នោត ។
សូមបញ្ជាក់ថា ផ្អែកតាមលទ្ធផល ជាផ្លូវការដែលប្រកាសដោយគណៈកម្មាធិការជាតិរៀបចំការបោះឆ្នោតកាលពី ថ្ងៃទី២៧ខែឧសភាថ្មីៗនេះចំនួនក្រុមប្រឹក្សា រាជធានី ខេត្ដ ក្រុង ស្រុក ខណ្ឌអាណត្ដិទី២ នេះមាន៣.៣២៤ រូបក្នុងនោះក្រុមប្រឹក្សារាជធានីខេត្ដមានចំនួន៣៩៣ រូប និង ក្រុមប្រឹក្សាក្រុង ស្រុក ខណ្ឌ មានចំនួន ២.៩៣១រូប ។ ដោយឡែកសម្រាប់រាជ ធានីភ្នំពេញមានគណបក្ស២ដែលទទួលបានអាសនៈក្នុងក្រុមប្រឹក្សារាជធានី ខណ្ឌ ជាលទ្ធផលក្រុមប្រឹក្សារាជធានីគណបក្សប្រជាជនកម្ពុជាទទួលបានសំឡេង គាំទ្រ ៥៧១សំឡេង គណបក្សសង្គ្រោះជាតិ ទទួលបាន២៣៧សំឡេង ។ ចំណែកលទ្ធ ផលក្រុមប្រឹក្សាខណ្ឌគណបក្សប្រជាជន កម្ពុជាទទួលបានសំឡេងគាំទ្រ៥៧១សំឡេង និងគណបក្សសង្គ្រោះជាតិទទួល បាន២៣៦សំឡេងក្នុងអង្គបោះឆ្នោត ដែលជាសមាជិកក្រុមប្រឹក្សាសង្កាត់ក្នុងអាណត្ដិសរុបចំនួន៨១០នាក់ ។
លោក កិត្ដិសេដ្ឋាបណ្ឌិត គាត ឈន់ ឧបនាយករដ្ឋមន្ដ្រីប្រចាំការ (Photos from http://nokorwatnews.com)