យោងតាមគេហទំព័រវិទ្យុអាស៊ីសេរី ដែលបានចេញផ្សាយកាលពីថ្ងៃ៣០ កក្កដា ម្សិលម៉ិញបាន សំភាសន៍ ពីការយល់ឃើញរបស់គណបក្សនយោបាយមួយចំនួន ដែល​បានចូលរួម​ប្រកួតប្រជែង​នៅក្នុងការ​បោះ​ឆ្នោត​នីតិកាលទី៥ ក្រៅអំពីគណបក្សប្រជាជនកម្ពុជា និងគណបក្សសង្គ្រោះជាតិ ដែលមិនមានអាសនៈក្នុងរដ្ឋសភា។ គណបក្សទាំងនោះបានចាប់អារម្មណ៍ប្រហាក់ប្រហែលគ្នាចំពោះសមាសភាព គ.ជ.ប ថ្មី ដើម្បីកែទម្រង់ការបោះឆ្នោតនៅអាណត្តិក្រោយនោះ ថាមិនបានផ្ដល់យុត្តិធម៌ដល់ពួកគេ និងមិនអាចជឿទុកចិត្តបានសម្រាប់ឲ្យចូលរួមប្រកួតប្រជែងបន្តនៅ អាណត្តិថ្មី។

នៅក្នុងការបោះឆ្នោតជ្រើសរើសតំណាងរាស្ត្រនីតិកាលទី៥ កាលពីឆ្នាំ២០១៣ មានគណបក្សនយោបាយចំនួន៨ ចូលរួមប្រកួតប្រជែង។

គណបក្សហ៊្វុនស៊ិនប៉ិច ដែលមាន លោក ញឹក ប៊ុនឆៃ ជាអគ្គលេខាធិការនៃគណបក្ស បានសម្ដែងការមិនពេញចិត្តចំពោះការរៀបចំ គ.ជ.ប តាមវិធីដែលបានព្រមព្រៀងគ្នាដោយគណបក្សទាំងពីរ ដែលមាន​សមាស​ភាពម្ខាង៤ និងមានសមាជិកទី៩ ជាសង្គមស៊ីវិល ដែលស្នើដោយបក្សទាំងពីរ។ លោកបានដាក់ការសង្ស័យចំពោះសមាជិកទី៩ គ.ជ.ប រូបនេះថា តើមានភាពឯករាជ្យពិតប្រាកដឬយ៉ាងណា? ហើយ​ប្រាកដ​ណាស់ បក្សនយោបាយទាំងសងខាងនឹងស្វែងរកប្រយោជន៍ឲ្យបក្សខ្លួន។

គណបក្សសម្ព័ន្ធដើម្បីប្រជាធិបតេយ្យ ដែលមាន លោក ខឹម វាសនា ជាប្រធាន ក៏បានរិះគន់ គ.ជ.ប ថ្មីនេះដែរថា ពុំមែនជា គ.ជ.ប ដែលឯករាជ្យ និងមានភាពអព្យាក្រឹត្យនោះទេ គឺជា គ.ជ.ប ដែលមានការសុខ​ព្រម​ពីគណបក្សទាំងពីរ និងជា គ.ជ.ប របស់គណបក្សនយោបាយ។

ដោយឡែកពីគណបក្សមួយទៀត លោក សេង សុខេង ប្រធានគណបក្សសញ្ជាតិកម្ពុជា បានបង្ហាញភាពស្ទាក់ស្ទើរសម្រាប់ការចូលរួមប្រកួតប្រជែងនៅអាណត្តិ ក្រោយ គឺនៅត្រង់របៀបរបបនៃការធ្វើការរបស់ គ.ជ.ប ថ្មីនេះ ដែលលោកនឹងស្ទង់មើលជាមុនសិន។

ផ្ទុយទៅវិញ អនុប្រធានគណបក្សសាធារណរដ្ឋប្រជាធិបតេយ្យ លោក ចាន់ យ៉េត បានគាំទ្រចំពោះការរៀបចំ គ.ជ.ប ថ្មីនេះ ប៉ុន្តែលោកទទូចឲ្យគណបក្សទាំងពីរធ្វើការប្រកបដោយតម្លាភាព ឥត​លម្អៀង​ទៅ​គណបក្សខ្លួន។

វិទ្យុអាស៊ីសេរីក៏បានព្យាយាមទាក់ទងគណបក្សខ្មែរអភិវឌ្ឍន៍សេដ្ឋកិច្ច ដើម្បីបញ្ចេញទស្សនៈជុំវិញការបង្កើត គ.ជ.ប ថ្មីនេះ តែមិនអាចទាក់ទងបាន។

រីឯ លោក ក្រវ៉ាញ ដារ៉ន ដែលជាប្រធានគណបក្សខ្មែរឈប់ក្រ ដែលកំពុងរស់នៅសហរដ្ឋអាមេរិក មានមតិថា ការរៀបចំបង្កើត គ.ជ.ប ថ្មីនៅពេលនេះ គឺជាការឥតប្រយោជន៍ទទេ។ បញ្ហាចម្បង គឺការ​ដោះ​ស្រាយ​បញ្ហាដែលប្រជាពលរដ្ឋខ្មែរកំពុងតែរងទុក្ខក្នុងពេល បច្ចុប្បន្ន ដូចជា ការបាត់បង់ដីធ្លី គ្មានទីលំនៅ និងរស់នៅក្នុងភាពក្រីក្រ ជាដើម។