លោកស ខេង៖ ស្វ័យភាពរបស់គជប និងការបន្ថែមខ្លឹមសារទាក់ទងនឹងការជ្រើសរើសសមាជិកគជបថ្មី ពុំចាំបាច់បន្ថែមក្នុងរដ្ឋធម្មនុញ្ញនោះទេ
លោក ស ខេង បានសរសេរលិខិតមួយច្បាប់នាថ្ងៃទី៣ ខែសីហា ឆ្នាំ២០១៤ ជូនលោកសមរង្ស៊ី ប្រធានគណបក្សសង្គ្រោះជាតិ ទាក់ទងនឹងការកែសម្រួលមាត្រា ៧៦ និងការបង្កើតជំពូក ទី១៥ ថ្មី ទាក់ទងនឹងអង្គការរៀបចំការបោះឆ្នោតដែលក្រុមការងាររបស់គណបក្សទាំងពីរ បានឯកភាពក្នុងកិច្ចប្រជុំ កាលពីថ្ងៃទី១ ខែសីហា ឆ្នាំ២០១៤ កន្លងទៅ នៅវិមានរដ្ឋសភា។ ប៉ុន្តែលោកសខេង បានបញ្ជាក់ថា អំពីស្វ័យភាពរបស់គជប និងការបន្ថែមខ្លឹមសារទាក់ទងនឹងការជ្រើសរើសសមាជិកគជបថ្មី ពុំចាំបាច់បន្ថែមក្នុងរដ្ឋធម្មនុញ្ញនោះទេ។
ក្នុងលិខិត លោក ស ខេង លើកឡើងថា "ចំពោះសំណើទាំង ២ ចំណុច ដែលគណបក្សសង្គ្រោះជាតិ ស្នើឡើង ទាក់ទងនឹងស្វ័យភាពរបស់គណៈកម្មាធិការជាតិរៀបចំការបោះឆ្នោត និងការបន្ថែមខ្លឹមសារទាក់ទងនឹងការជ្រើសរើសសមាជិកថ្មីជំនួស ក្នុងករណីមានការបាត់បង់សមាជិកភាពនោះ គណបក្សប្រជាជនកម្ពុជា យល់ឃើញថា ចំណុចទាំងនេះ ពុំមានការចាំបាច់រៀបចំបញ្ចូលទៅក្នុងរដ្ឋធម្មនុញ្ញនោះទេ ព្រោះថា រដ្ឋធម្មនុញ្ញ គឺជាច្បាប់កំពូលរបស់ជាតិ ដែលត្រូវចែងតែអំពីគោលការណ៍ធំៗតែប៉ុណ្ណោះ"។
ម្យ៉ាងទៀត លោក ស ខេង បន្តថា "គោលការណ៍ដែលក្រុមការងារគណបក្សទាំងពីរ បានឯកភាពគ្នា បញ្ចូលទៅក្នុងសេចក្តីព្រាងច្បាប់រដ្ឋធម្មនុញ្ញ កាលពីថ្ងៃទី១ ខែសីហា កន្លងទៅ គឺមានលក្ខណៈគ្រប់គ្រាន់ ដើម្បីធានាឲ្យគណៈកម្មាធិការជាតិរៀបចំការបោះឆ្នោត អនុវត្តសមត្ថកិច្ចរបស់ខ្លួន ទាក់ទងនឹងការបោះឆ្នោត ប្រកបដោយឯករាជ្យ និងអព្យាក្រឹត ស្របទៅនឹងស្មារតីនៃកិច្ចព្រមព្រៀងរវាងគណបក្សទាំងពីរ។
