បន្ទាប់ពីលោក សម រង្ស៊ី ប្រធានគណបក្សសង្គ្រោះជាតិ បានដឹកនាំគណៈប្រតិភូ គោរពវិញ្ញាណក្ខ័ណ្ឌសម្តេច ជា ស៊ីម នាព្រឹកថ្ងៃ ព្រហសត្ប៏ ទី១១ មិថុនា លោក សម រង្ស៊ី បានថ្លែងថា ការដែលលោកនាយករដ្ឋមន្ត្រី ហ៊ុន សែន បបួលរូបលោកទៅស្បថនៅមុខព្រះអង្គដងកើ ទាក់ទងរឿងចោទប្រកាន់ពីការបន្លំសន្លឹកឆ្នោតកាលពីឆ្នាំ២០១៣នោះ គឺមិនបះពាល់ដល់វប្បធម៌សន្ទនារវាងគណបក្សទាំងពីរនោះទេ។ ដោយលោកចាត់ទុកថា នេះជាទំនៀមទំលាប់ខ្មែរ ដែលមនុស្សមួយចំនួនជឿលើអបិយជំនឿខ្លះ និងបច្ចេក វិទ្យាខ្លះ។ តែលោកបន្ថែមថា អ្វីដែលសំខាន់ជាអទិភាពត្រូវធ្វើមុនគេ គួរតែផ្ទៀងផ្ទាត់តួលេខ និងបើកហឹបរាប់សន្លឹកឆ្នោតឡើងវិញ ដើម្បីបង្ហាញពីតម្លាភាព។ យ៉ាងណាក៏ដោយលោកថា បច្ចុប្បន្នគណបក្សឈ្នះឆ្នោតទាំងពីរកំពុងអនុវត្តវប្បធម៌សន្ទនា ដូចនេះគឺត្រូវតែជជែកគ្នារកដំណោះស្រាយដោយសន្តិវិធី រាល់បញ្ហាប្រទេសជាតិទាំងអស់ និងអ្វីដែលជាទុក្ខកង្វល់របស់ប្រជារាស្ត្រខ្មែរ។