អ្នកនាំពាក្យក្រសួងការបរទេសវៀតណាម លោកLe Hai Binh បានស្នើឲ្យអាជ្ញាធរកម្ពុជារៀបចំជា វិធានការ ដើម្បីបង្ការកុំឲ្យមានជម្លោះនៅតាមព្រំដែនម្តងទៀត ដោយបានចាត់ទុកការប៉ះទង្គិចគ្នានៅតាមបណ្តោយព្រំដែនខេត្តស្វាយរៀង បង្កដោយ«ពួកជ្រុលនិយមរបស់កម្ពុជាមួយចំនួន»។
លោកLe Hai Binh បានថ្លែងថាលោកចាត់ទុកថាហិង្សាកើតឡើងកាលពីថ្ងៃអាទិត្យ ទី២៨មិថុនា នេះថា ដោយសារ «ពួកជ្រុលនិយមកម្ពុជាមួយចំនួន ដែលរំលោភបំពានច្បាប់កម្ពុជានិងវៀតណាម ក៏ដូចជាសន្ធិសញ្ញានិងកិច្ចព្រមព្រៀងដែលប្រទេសទាំងពីរបានធ្វើ»។ លោកបញ្ជាក់ថា «យើងបានស្នើឲ្យអាជ្ញាធរកម្ពុជារៀបចំជាវិធានការក្នុងការដោះស្រាយឧបទ្ទវហេតុនេះឲ្យបានត្រឹមត្រូវនិងបង្ការសកម្មភាពបែបនេះកុំឲ្យកើតឡើងម្តងទៀតដើម្បីធានាពីការអនុវត្តឲ្យបានរលូននៃការកំណត់ព្រំដែននិងបោះបង្គោលព្រំដែន ដើម្បីជាប្រយោជន៍រួមនៃប្រជាជនទាំងពីរ»។
កាលពីថ្ងៃអាទិត្យ តំណាងរាស្ត្របក្សសង្គ្រោះជាតិ ដែលដឹកនាំដោយលោក រៀល ខេមរិន្ទ្រ លោក អ៊ុំ សំអាន និងប្រធានសហគមន៍ខ្មែរកម្ពុជាក្រោមនៅកម្ពុជា លោក ថាច់ សេដ្ឋា បានដឹកនាំប្រជាពលរដ្ឋ និងព្រះសង្ឃកម្ពុជាក្រោម ចុះពិនិត្យព្រំដែនខេត្តស្វាយរៀង ត្រង់ចំណុចភូមិគោកធ្លក ឃុំត្នោត ស្រុកកំពង់រោទិ៍ ខេត្តស្វាយរៀង បន្ទាប់ពីទទួលដំណឹងពីប្រជាពលរដ្ឋថាវៀតណាមបានរំលោភទឹកដីខ្មែរ និងកំពុងធ្វើផ្លូវនៅតំបន់ដែលមិនទាន់ឯកភាពគ្នាបោះបង្គោល។
បន្ទាប់ពីផ្ទុះជំលោះហិង្សា រវាងប្រជាពលរដ្ឋកម្ពុជា និងភាគីខាងវៀតណាម សាលាខេត្តស្វាយរៀងបានប្រកាសមិនទទួលខុសត្រូវតាមផ្លូវច្បាប់លើការ ប៉ះទង្គិចនៅតាមព្រំដែន កាលពីថ្ងៃទី២៨ខែមិថុនា ដោយអះអាងថាក្រុមប្រជាពលរដ្ឋចុះពិនិត្យព្រំដែនមិនបានជូនដំណឹង អាជ្ញាធរខេត្តជាមុន។