លោក ហ៊ុន សែន នឹងឲ្យសមាជិកព្រឹទ្ធសភា និងរដ្ឋសភា មកពីគ្រប់និន្នាការ រួមទាំងគណបក្សនយោបាយ ត្រៀមខ្លួនផ្ទៀងផ្ទាត់ផែនទីជាមួយរដ្ឋាភិបាល
លោកនាយករដ្ឋមន្ត្រី ហ៊ុន សែន បានអញ្ជើញក្រុមប្រឹក្សាធម្មនុញ្ញ សមាជិកព្រឹទ្ធសភា និងរដ្ឋសភា មកពីគ្រប់និន្នាការ រួមទាំងគណបក្សនយោបាយ និងអ្នកបច្ចេកទេសទាំងអស់ ឲ្យត្រៀមខ្លួនផ្ទៀងផ្ទាត់ផែនទីជាមួយរដ្ឋាភិបាល។ លោកមិនសុខចិត្តនោះឡើយចំពោះការរិះគន់ថា រដ្ឋាភិបាលប្រើប្រាស់ផែនទីក្លែងក្លាយ ការបែបនេះរបស់លោក នាយករដ្ឋមន្ត្រី ហ៊ុន សែន គឺក្នុងពិធី សម្ពោធស្ពានមិត្តភាពកម្ពុជា ចិន តាខ្មៅ នៅថ្ងៃទី៣ សីហាព្រឹកមិញនេះ។
លោក ហ៊ុន សែន បន្តថា រដ្ឋាភិបាលរបស់លោក នឹងចំណាយគ្រប់យ៉ាងដើម្បីបានផែនទីដើម្បីបញ្ជាក់ឲ្យ ច្បាស់លាស់។ ហើយបញ្ហាផែនទីនេះ លោក ហ៊ុន សែន បន្ថែមថា បើបក្សប្រឆាំងមានផែនទីពិត សុំថ្វាយព្រះមហាក្សត្រ ឬរាជបណ្ឌិត្យសភា បើមិនចង់ប្រគល់ឲ្យលោកផ្ទាល់ ប៉ុន្តែបើអ្នកចោទមិនហ៊ានបង្ហាញការពិត អ្នកនោះជាអ្នកភូតភរបោកប្រាស់ពិតប្រាកដ។
សូមបញ្ជាក់ថា ដើមខែកក្កដា កន្លងទៅ លោកនាយករដ្ឋមន្ត្រី ហ៊ុន សែន បានដាក់លិខិតស្នើទៅកាន់អគ្គលេខាធិការអង្គការសហប្រជាជាតិ លោក បាន គីមូន ដើម្បីសុំខ្ចីផែនទីខ្មែរ តម្កល់ទុកនៅអង្គការសហប្រជាជាតិ យកមកផ្ទៀងផ្ទាត់ជាមួយផែនទីរបស់រដ្ឋាភិបាល ដើម្បីដោះស្រាយបញ្ហាព្រំដែន ជាមួយប្រទេសវៀតណាម។ ផែនទីដែលតម្កល់ទុកនៅ អង្គការសហប្រជាជាតិនេះ ជាផែនទីខ្នាត ១/១០០.០០០ ដែលរដ្ឋាភិបាលបារាំងបោះពុម្ព នៅចន្លោះឆ្នាំ១៩៣៣ ដល់១៩៥៣ ហើយព្រះបរមរតនកោដ្ឋ នរោត្តម សីហនុ យកទៅតម្កល់ទុកនៅអង្គការសហប្រជាជាតិនៅឆ្នាំ១៩៦៤។
បញ្ហាព្រំដែនជាមួយវៀតណាមនៅពេលបច្ចុប្បន្នបានកក្រើកឡើងវិញ បន្ទាប់ពីបក្សប្រឆាំងដឹកនាំយុវជនមួយចំនួន ចុះទៅមើលបង្គោលព្រំដែន ដែលសង្ស័យថាវៀតណាមបោះបង្គោលចូលដីខ្មែរ និងរហូតដល់មានអំពើហិង្សារវាងពលរដ្ឋវៀតណាម និងខ្មែរទៀតផង។
