ព្រះមហាក្សត្របានចេញព្រះរាជក្រឹត្យត្រាស់បង្គាប់ឲ្យមានការកែសម្រួលព្រំដែនរដ្ឋបាលរវាងខេត្តតាកែវ ជាមួយខេត្តកំពត និងកំពង់ស្ពឺ ដោយកាត់យកផ្ទៃដីមួយចំនួនពីខេត្តកំពត និងដីមួយផ្នែកពីខេត្តកំពង់ស្ពឺមកឲ្យខេត្តតាកែវ តាមសំណើរបស់រដ្ឋាភិបាល។
ព្រះរាជក្រឹត្យចុះថ្ងៃទី១៧ ខែកក្កដា ឆ្នាំ២០១៥កន្លងទៅ ព្រះមហាក្សត្រទ្រង់ត្រាស់បង្គាប់ឲ្យកាត់ដីមួយផ្នែកពីឃុំស្រែចែង ស្រុកជុំគិរី ខេត្តកំពតឲ្យមកឃុំអូរសារាយ ស្រុកត្រាំកក់ ខេត្តតាកែវ។ ក្នុងព្រះរាជក្រឹត្យដដែល ព្រះមហាក្សត្រក៏ត្រាស់បង្គាប់ឲ្យកាត់ដីមួយផ្នែកពីឃុំស្រែចែង ស្រុកជុំគិរី និងឃុំតាកែន ស្រុកឈូក មកឲ្យឃុំត្រពាំងក្រញូង ស្រុកត្រាំកក់ ខេត្តតាកែវ។ ព្រះមហាក្សត្រក៏បានត្រាស់បង្គាប់ឲ្យកាត់ដីមួយផ្នែកពីឃុំដំបូករូង ស្រុកភ្នំស្រួច ខេត្តកំពង់ស្ពឺ មកឲ្យឃុំត្រពាំងក្រញូង ស្រុកត្រាំកក់ ខេត្តកែវផងដែរ។