សមត្ថកិច្ចខេត្ដឧត្ដរមានជ័យមិនទទួលពាក្យបណ្ដឹងបក្សប្រឆាំងករណីដុតស្លាកគណបក្ស
មន្ដ្រីគណបក្សសង្គ្រោះជាតិ ខេត្ដឧត្ដរមានជ័យ អះអាងថា សមត្ថកិច្ចខេត្ដនេះ បដិសេធមិនទទួលពាក្យបណ្ដឹងវែកមុខរកជនដៃដល់ដែលដុតបំផ្លាញស្លាក គណបក្សរបស់ខ្លួន ដោយចាត់ទុកថា វាជារឿងនយោបាយ។ ស្លាកគណបក្សសង្គ្រោះជាតិមួយផ្ទាំង ស្ថិតនៅភូមិសំបួរមាស សង្កាត់បន្សារាក់ ក្រុងសំរោង កាលពីថ្ងៃទី១៦ ខែតុលា ត្រូវបានមនុស្សប្រមាណ២០នាក់ នាំគ្នាដុតបំផ្លាញ ក្រោមហេតុផលថាគ្មានជំនឿលើបក្សប្រឆាំង។សកម្មជនគណបក្សប្រឆាំង ខេត្ដឧត្ដរមាជ័យ លោក ឃុំ សុខុន ប្រាប់អ្នកសារព័ត៌មាន នៅថ្ងៃអាទិត្យនេះថា ប៉ុស្ដិ៍នគរបាលសង្កាត់បន្សារាក់ ឈ្មោះ សំ និងអធិការក្រុងសំរោង លោក ស៊ុន សាន្ដ មិនទទួលពាក្យបណ្ដឹងរបស់លោកដែលប្ដឹងឲ្យរកយុត្ដិធម៌ ករណីដុតបំផ្លាញស្លាកគណបក្សសង្គ្រោះជាតិនោះទេ ដោយបញ្ជាឲ្យប្ដឹងទៅសាលាក្រុងវិញ។
