សកម្មជនបក្សប្រឆាំងនៅពោធិ៍សាត់ត្រូវកាត់ទោសឲ្យជាប់គុក៥ឆ្នាំពីបទកាប់រានដីព្រៃ
មេធាវីការពារសិទ្ធិឲ្យជនជាប់ចោទពីបទកាប់រុករានដីព្រៃបម្រុងទុក ដែលជាសកម្មជនបក្សសង្គ្រោះជាតិ ប្រចាំស្រុកក្រគរ ខេត្តពោធិ៍សាត់ នឹងរៀបចំបណ្ដឹងប្ដឹងឧទ្ធរណ៍ បន្ទាប់ពីចៅក្រមសាលាដំបូងខេត្តពោធិ៍សាត់ ប្រកាសសាលក្រមផ្ដន្ទាទោសដាក់គុកកូនក្ដីរបស់ខ្លួនរយៈពេល ៥ឆ្នាំ។ មេធាវី និងមន្ត្រីការពារសិទ្ធិមនុស្សចាត់ទុកសាលក្រមនេះថា មានភាពអយុត្តិធម៌។ ប្រធានក្រុមប្រឹក្សាជំនុំជម្រះនៃសាលាដំបូងខេត្តពោធិ៍សាត់ ដែលកាន់សំណុំរឿងនេះ គឺលោក ម៉ៅ ស៊ីណា បដិសេធមិនអត្ថាធិប្បាយថា លោកបានចេញដីកាតាមចាប់ខ្លួនលោក សោម សារាវុត ឬយ៉ាងណានោះទេ កាលពីរសៀលថ្ងៃទី៣ ខែវិច្ឆិកា បន្ទាប់ពីចៅក្រមរូបនេះប្រកាសសាលក្រមផ្ដន្ទាទោសដាក់ពន្ធនាគារលោក សោម សារាវុត កាលពីរសៀលថ្ងៃទី២ ខែវិច្ឆិកា ឆ្នាំ២០១៥ កន្លងទៅ។
