លោក ឈាង វុន ដឹកនាំគណៈប្រតិភូទៅសួរសុខទុក្ខតំណាងរាស្រ្តដែលត្រូវវាយដំនៅប្រទេសថៃ
គណៈប្រតិភូរដ្ឋសភាដែល ដឹកនាំដោយលោក ឈាង វុន ប្រធានគណៈកម្មការកិច្ចការបរទេស សហប្រតិបត្តិការអន្តរជាតិ ឃោសនាការនិងព័ត៌មាននៃរដ្ឋសភា នឹងទៅប្រទេសថៃ នៅថ្ងៃនេះ ដើម្បីសួរសុខទុក្ខតំណាងរាស្រ្តគណបក្សសង្រ្គោះជាតិពីររូបគឺលោក គង់ សភានិងលោក ញ៉យ ចំរើន ដែលរងការវាយដំកាលពីថ្ងៃទី២៦ខែតុលា ឆ្នាំ២០១៥។សេចក្តីប្រកា សព័ត៌មានរបស់អគ្គលេខាធិការដ្ឋានរដ្ឋសភាដែលចេញផ្សាយកាលពីថ្ងៃព្រហស្បតិ៍ម្សិលមិញ ឲ្យដឹងថា លោក ឈាង វុន អ្នកនាំពាក្យរដ្ឋសភា លោក យ៉ែម បុញ្ញឫទ្ធិ ប្រធានគណៈកម្មការអប់រំ យុវជន កីឡា ធម្មការ កិច្ចការសាសនា វប្បធម៌និងទេសចរណ៍នៃរដ្ឋសភានិងលោកស្រី បាន ស្រីមុំ សមាជិកាគណៈកម្មការកិច្ចការបរទេស សហប្រតិបត្តិការអន្តរជាតិ ឃោសនានិងព័ត៌មាននៃរដ្ឋសភា នឹងទៅសួរសុខទុក្ខតំណាងរាស្រ្តទាំងពីររូប ចាប់ពីថ្ងៃទី០៦ដល់ថ្ងៃទី០៨ ខែវិច្ឆិកា។ សេចក្តីប្រកាសបន្តថាការសួរសុខទុក្ខនេះ ត្រូវបានចាត់តាំងដោយលោក ហេង សំរិន ប្រធានរដ្ឋសភា។
