តំណាងរាស្រ្តបក្សប្រឆាំងពីររូបដែលរងអំពើហិង្សាប្តឹងជនដៃដល់ពីបទមនុស្សឃាតដោយចេតនា
តំណាងរាស្រ្តគណបក្សសង្គ្រោះជាតិ ពីររូបដែលរងរបួសដោយសារការរវាយដំកាលពីចុងខែតុលា បានដាក់ពាក្យបណ្តឹងទៅសាលាដំបូងរាជធានីភ្នំពេញ ដោយប្តឹងពីបទប៉ុនប៉ងមនុស្សឃាតដោយចេតនានិងទាមទារប្រាក់សំណង ក្នុងម្នាក់ៗចំនួន១០០លានរៀល(ស្មើប្រមាណ២៥០០០ដុល្លារ)។កាលពីថ្ងៃទី២៦ ខែតុលា ឆ្នាំ២០១៥ តំណាងរាស្រ្តគណបក្សសង្គ្រោះជាតិ លោក ញ៉យ ចំរើន និងលោក គង់ សភា បានរងរបួសធ្ងន់ធ្ងរដោយការព្រួតវាយក្បែររបងរដ្ឋសភា ដោយគណបក្សប្រឆាំងបានចោទប្រកាន់ថាអ្នកបង្កហិង្សានេះគឺជាបាតុករ មួយក្រុមតូចដែលបានចូលរួមធ្វើបាតុកម្មទាមទារឲ្យរដ្ឋសភាដកតំណែង របស់លោក កឹម សុខា។លោក ជួង ជូងី ដែលជាមេធាវីរបស់តំណាងរាស្រ្តទាំងពីររូប បានឲ្យដឹងនៅថ្ងៃអង្គារនេះថាលោកបានយកពាក្យបណ្តឹងទៅដាក់ នៅសាលាដំបូងរាជធានីនៅព្រឹកថ្ងៃអង្គារនេះ។
