លោក គល់ បញ្ញា នាយកប្រតិបត្តិនៃគណៈកម្មការដើម្បីបោះឆ្នោតដោយសេរី និងយុត្តិធម៌នៅកម្ពុជា ហៅកាត់ថា (ខុមហ្វ្រែល) បានសម្ដែងក្តីរំភើប ដែលបានធ្វើជាសាក្សី ក្នុងការបាះឆ្នោតនៅភូមា នាខែវិច្ឆិកា ២០១៥នេះ។លោកបានបន្តថា ការចូលរួម របស់ប្រជាពលរដ្ឋ យ៉ាងច្រើន ពិតជាសាទរ ការបោះឆ្នោត និង ប្តេជ្ញាចិត្ត ដើម្បីបុព្វហេតុ ការផ្លាស់ប្តូរ។ អ្វីជារឿងចាប់អារម្មណ៍ខ្លាំង គឺ មានសញ្ញាវិជ្ជមាន ក្រោយការបោះឆ្នោត ក្នុងអន្តរកាលការផ្ទេរអំណាច ដោយសន្តិវិធី។ លោកថា មានបេក្ខជន និង អ្នកដឹកនាំ គណៈបក្ស កាន់អំណាច បានទទួលយកការចាញ់ឆ្នោត។លោកគល់ បញ្ញា បានបញ្ជាក់បន្ថែមថាការសង្កេត របស់លោកឃើញថា ស្ត្រីភូមាជាច្រីន ជាអ្នកចាត់ចែងការបោះឆ្នោត និងរាប់សន្លឹកឆ្នោត ដោយយកចិត្តទុកដាក់ និងមានការប្តេជ្ញាចិត្តខ្ពស់។ ស្ត្រីបានចូលរួមចាត់ចែងការបោះឆ្នោតដ៏ត្រឹមត្រូវមួយ។