CNRPប្តេជ្ញាបន្តពង្រឹងវប្បធម៌សន្ទនាជាមួយCPPបើទោះជាមានការចាប់ខ្លួនលោក សម រង្ស៊ី
មន្ត្រីជាន់ខ្ពស់គណបក្សប្រឆាំង លើកឡើងថា គណបក្សនេះនៅតែបន្តពង្រឹងវប្បធម៌សន្ទនាជាមួយគណបក្សកាន់អំណាចដដែល បើទោះជាអាជ្ញាធរចាប់ខ្លួនលោក សម រង្ស៊ី នៅថ្ងៃខាងមុខ តាមដីការបស់តុលាការក៏ដោយ។តំណាងរាស្ត្រនិង ជាអគ្គនាយកហិរញ្ញវត្ថុនៃ គណបក្សសង្គ្រោះជាតិលោកគី វណ្ណដារ៉ា ថ្លែងបែបនេះក្នុងកិច្ចសន្ទនារវាងយុវជនជាមួយគណបក្សនយោបាយ ស្តីពី ការចូលរួមរបស់យុវជនក្នុងការពង្រឹងវប្បធម៌សន្ទនា កាលពីព្រឹកថ្ងៃអាទិត្យម្សិលមិញ។ក្នុងកិច្ចសន្ទនានោះដែរ អ្នកនាំពាក្យគណបក្សប្រជាជនកម្ពុជា លោក សុខ ឥសាន ថ្លែងថា លោក គាំទ្រនិងការលើកឡើងរបស់លោក គី វណ្ណដារ៉ា ដែលចង់រក្សាវប្បធម៌សន្ទនា។ ប៉ុន្តែលោកថា ដើម្បីរក្សាវប្បធម៌សន្ទនាបាន លុះត្រាតែគូភាគីអត់ធ្មត់ មានសុជីវធម៌ ឈប់និយាយរិះគន់រដ្ឋាភិបាល ផ្ទុយនឹងកិច្ចព្រមព្រៀងថ្ងៃទី២២ កក្កដា ២០១៤ ទើបធ្វើឲ្យប្រទេសមានស្ថិរភាព និងសន្តិភាព។
