នាយករដ្ឋមន្រ្តីប្រកាសយកហ្វេសប៊ុកជាវេទិកាឆ្លងឆ្លើយជាមួយយុវជន
លោកនាយករដ្ឋមន្រ្តី ហ៊ុន សែន នៅព្រឹកថ្ងៃសុក្រនេះ បានប្រកាសយកទំព័រហ្វេសប៊ុករបស់លោកដែលមានអ្នកចុចចូលចិត្ត(Likes) ជិត២លាននាក់ មកធ្វើជាវេទិកាដើម្បីឆ្លើយឆ្លងជាមួយយុវជនលើប្រធានបទសង្គមផ្សេងៗ។ លោកបានសរសេរនៅលើហ្វេសប៊ុកនៅព្រឹកថ្ងៃសុក្រនេះថា៖ “ហ្វេសប៊ុក(Facebook) ខ្ញុំជាជាហ្វេសប៊ុកសន្តិភាព ដែលលើកតម្កើងសិទ្ធិសេរីភាព និងសកម្មភាពចូលរួមកសាងសង្គមដោយអហិង្សា។ ខ្ញុំយល់ថាការចូលរួមពីមហាជន ជាពិសេសពីស្រទាប់យុវជន គឺនឹងជួយជំរុញអោយការកសាងសង្គមជាតិយើងកាន់តែមានសន្ទុះលឿនទៅមុខ”។ លោកបន្ថែមថា ដើម្បីបង្កបរិយាកាសកាន់តែរីករាយស្និទស្នាលជាមួយជនរួមជាតិនិងយុវជន សិស្ស និស្សិតនៅទូទាំងប្រទេស លោកនឹងបើកវេទិការឆ្លើយឆ្លងជាមួយយុវជននិងអ្នកលេងហ្វេសប៊ុកទៅលើ ប្រធានបទដែលមានសារៈសំខាន់ក្នុងការកសាងសង្គម ដូចជាការគោរពច្បាប់ចរាចរណ៍ អំពើល្អចំពោះមនុស្សចាស់ជរានិងជនពិការ អំពើល្អចំពោះកុមារនិងស្រ្តីទន់ខ្សោយ ការជួយគ្នានៅពេលមានគ្រោះថ្នាក់ចរាចរណ៍ ការចូលរួមរើសសំរាមសំអាតទីក្រុងនិងតាមទីធ្លាសាធារណៈ ការទប់ស្កាត់និងលុបបំបាត់គ្រឿងញៀន និងការឈប់ជក់បារីជាដើម។
