លោក ហ៊ុន ម៉ានី រំពឹងថាលោក សម រង្ស៊ី នឹងត្រូវអនុញ្ញាតឲ្យចូលរួមការបោះឆ្នោតឆ្នាំ២០១៨
កូនប្រុសរបស់នាយករដ្ឋមន្រ្តីនិងជាតំណាងរាស្រ្តខេត្តកំពង់ស្ពឺ លោក ហ៊ុន ម៉ានី បានថ្លែងថាលោករំពឹងថាប្រធានគណបក្សសង្រ្គោះជាតិលោក សម រង្ស៊ី ដែលកំពុងគេចពីការចាប់ខ្លួន នឹងអាចចូលរួមប្រកួតប្រជែងការបោះឆ្នោតនៅឆ្នាំ២០១៨ខាងមុខ។លោកបានថ្លែងបែបនេះទៅកាន់អ្នកសារព័ត៌មានAPក្នុងបទសម្ភាសន៍មួយ ខណៈលោកកំពុងតែមានវត្តមាននៅសហរដ្ឋអាមេរិក។ នៅក្នុងអត្ថបទសារព័ត៌មានAP លោក ហ៊ុន ម៉ានី ត្រូវបានដកស្រង់សម្តីថាលោករំពឹងថាលោក សម រង្ស៊ី នឹងត្រូវបានអនុញ្ញាតឲ្យចូលរួមប្រកួតប្រជែងការបោះឆ្នោតឆ្នាំ២០១៨ ប៉ុន្តែលោកមិនបានពន្យល់ថាត្រូវធ្វើយ៉ាងម៉េចនោះទេ។ បើតាមអត្ថបទនោះ លោក ហ៊ុន ម៉ានី អាយុ៣៣ឆ្នាំ ក៏បានបញ្ជាក់ថាលោកចង់ក្លាយជាមេដឹកនាំម្នាក់ តែលោកថាលោកគួរតែត្រូវបានវិនិច្ឆ័យដោយសកម្មភាពរបស់លោកមិនមែនដោយសារ ឈ្មោះគ្រួសារនោះទេ។
