ប្រធានរដ្ឋសភាបញ្ជូនលិខិតតំណាងរាស្រ្តទៅនាយករដ្ឋមន្រ្តី ករណីដីសម្បទានផ្តល់ឲ្យកងទ័ពប្រជាជនវៀតណាម
ប្រធានរដ្ឋសភា លោក ហេង សំរិន បានបញ្ជូនលិខិតរបស់តំណាងរាស្រ្តគណបក្សសង្រ្គោះជាតិដែលសួរនាំរដ្ឋាភិបាលទាក់ទងនឹងដីសម្បទានសេដ្ឋកិច្ចក្នុងខេត្តរតនគិរី ដែលមានការចុះផ្សាយថាគ្រប់គ្រងដោយកងទ័ពប្រជាជនវៀតណាម។
លិខិតមួយច្បាប់ចុះថ្ងៃទី៩ ខែមិនា ដាក់ទៅលោកនាយករដ្ឋមន្រ្តី ហ៊ុន សែន ដោយមានការឯកភាពពីប្រធានរដ្ឋសភា ឲ្យដឹងថាតំណាងរាស្រ្តបក្សប្រឆាំង លោក អ៊ុំ សំអាន បានដាក់ជាសំណួរទៅរដ្ឋាភិបាលថាហេតុអ្វីបានជាកងទ័ពប្រជាជនវៀតណាមទទួលបានការគ្រប់គ្រងដីសម្បទានសេដ្ឋកិច្ចនៅខេត្តរតនគិរី? លោកសួរបន្តថាតើមានវត្តមានកងទ័ពប្រជាជនវៀតណាមនៅលើដីសម្បទានសេដ្ឋកិច្ចដែលគ្រប់គ្រងដោយកងទ័ពប្រជាជនវៀតណាមនៅខេត្តរតនគិរីឬទេ? តើរាជរដ្ឋាភិបាលមានគម្រោងដកហូតដីសម្បទានសេដ្ឋកិច្ចដែលគ្រប់គ្រងដោយកងទ័ពវៀតណាមនៅខេត្តរតនគិរីឬទេ?
