នាយករដ្ឋមន្រ្តីឲ្យអតីតប្រធាន គ.ជ.ប ធ្វើជាទេសរដ្ឋមន្រ្តីទទួលបន្ទុកបេសកកម្មពិសេស
លោកនាយករដ្ឋមន្ត្រី ហ៊ុន សែន បានដាក់សំណើទៅកាន់ប្រធានរដ្ឋសភា លោក ហេង សំរិន ដើម្បីកែសម្រួលតួនាទីរបស់អតីតប្រធានគណៈកម្មាធិការជាតិរៀបចំការបោះ ឆ្នោត(គ.ជ.ប) លោក អ៊ឹម សួស្តី ពីការស្នើតែងតាំងជារដ្ឋលេខាធិការមកជាទេសរដ្ឋមន្ត្រីវិញ។កាលពីថ្ងៃទី១៦ ខែមីនា ឆ្នាំ២០១៦ រដ្ឋាភិបាលបានដាក់សំណើទៅកាន់រដ្ឋសភាដើម្បីស្នើសុំកែសម្រួលសមាសភាព នៃសមាជិករដ្ឋាភិបាល ដោយរដ្ឋាភិបាលក៏បានស្នើឲ្យមានការតែងតាំងរដ្ឋលេខាធិការចំនួន១១ រូបផងដែរ។ ក្នុងនោះ លោក អ៊ឹម សួស្តី ក៏ត្រូវបានស្នើឲ្យតែងតាំងជាងរដ្ឋលេខាធិការក្រសួងមហាផ្ទៃ។ក្នុងលិខិតមួយច្បាប់ចុះថ្ងៃទី២០ ខែមីនា ឆ្នាំ២០១៦ លោកនាយករដ្ឋមន្ត្រី ហ៊ុន សែន បានស្នើទៅកាន់ប្រធានរដ្ឋសភា លោក ហេង សំរិន តែងតាំងលោក អ៊ឹម សួស្តី ជាទេសរដ្ឋមន្ត្រីទទួលបន្ទុកបេសកកម្មពិសេសវិញ។ ទោះយ៉ាងណា លិខិតនេះមិនបានបញ្ជាក់ពីមូលហេតុនៃការស្នើផ្លាស់ប្ដូរនេះនោះទេ ។ប្រភពVOD
