លោក ឱម យ៉ិនទៀងព្រមានលាតត្រដាងអំពើពុករលួយរបស់លោកសម រង្ស៊ី
ប្រធានអង្គភាពប្រឆាំងអំពើពុករលួយ លោកឱម យ៉ិនទៀង បានឱ្យដឹងថាអង្គភាពមានព័ត៌មានសំងាត់ស្តីពីអំពើពុករលួយរបស់លោក សម រង្ស៊ី។ ប្រធានអង្គភាពរូបនេះ បានអះអាងថាប្រសិនបើលោក សម រង្ស៊ីនៅបន្តរិះគន់ជាបន្តទៀត លោកនឹងបញ្ចេញព័ត៌មានទាំងនេះ។ គណបក្សសង្គ្រោះជាតិស្វាគមន៍ចំពោះព័ត៌មាននេះ។ សម្រាប់ប្រធានអង្គភាពប្រឆាំងអំពើពុករលួយរបស់រដ្ឋាភិបាល ក្រៅពីករណីលោក សម រង្ស៊ីខ្លួនឯង ក៏មានដែរករណីអំពើពុករលួយរបស់មន្ត្រីគណបក្សសង្គ្រោះជាតិជាច្រើន ទៀត។ ប៉ុន្តែប្រធានអង្គភាពនេះ នៅមិនទាន់បញ្ជាក់ពីប្រភេទនៃអំពើពុករលួយដែលលោក សម រង្ស៊ីមាននោះដែរ។
ភ្លាមៗគណបក្សសង្គ្រោះជាតិ ស្វាគមន៍ចំពោះព័ត៌មានពីអង្គភាពប្រឆាំងអំពើពុករលួយរបស់មេដឹកនាំ គណបក្សខ្លួនដែលកំពុងរុំព័ទ្ធដោយបណ្តឹងតុលាការ។ លោកអេង ឆៃអ៊ាង មន្ត្រីជាន់ខ្ពស់គណៈមជ្ឈឹមគណបក្សសង្គ្រោះជាតិ លើកឡើងថា គណបក្សគ្មានការភ័យព្រួយអ្វីឡើយចំពោះការព្រមាននេះ ព្រោះថាអំពើពុករលួយគឺជាអ្វីដែលពលរដ្ឋខ្មែរស្អប់ខ្ពើម ប៉ុន្តែអង្គភាពត្រូវតែធ្វើការដោយយុត្តិធម៌។ប្រភពRFI
