នាយករដ្ឋមន្រ្តីអំពាវនាវកុំឲ្យដំឡើងថ្លៃរថយន្តធំៗនិងតាក់ស៊ី
លោកនាយករដ្ឋមន្រ្តី ហ៊ុន សែន នៅថ្ងៃព្រហស្បតិ៍នេះ បានអំពាវនាវកុំឲ្យមានការដំឡើងថ្លៃទៅលើមធ្យោបាយដឹកជញ្ជូន នៅពេលចូលឆ្នាំខាងមុខនេះ។ក្នុងពិធីសម្ពោធមហាកុដិនៅវត្តក្រពើហា ក្រុងតាខ្មៅ លោក ហ៊ុន សែន បានថ្លែងអំពាវនាវដល់រថយន្តធំនិងតាក់ស៊ី កុំឲ្យដំឡើងថ្លៃរថយន្តនៅពេលចូលឆ្នាំខាងមុខ ដោយលោកថាតម្លៃប្រេងសាំងបានធ្លាក់ចុះ ដូច្នេះមិនគួរមានការដំឡើងថ្លៃឈ្នួលនោះទេ។ លោកបញ្ជាក់ថាការមិនដំឡើងថ្លៃនេះជា”កាយវិការមួយនៃការយោគយល់គ្នា”។គួរបញ្ជាក់ថាជារៀងរាល់ឆ្នាំ លោក ហ៊ុន សែន តែងតែបានអំពាវនាវដល់អ្នកបើកបររថយន្តឈ្នួលនិងក្រុមហ៊ុនរថយន្តដឹកអ្នកដំណើរទាំងអស់ កុំឲ្យដំឡើងថ្លៃរថយន្តនៅក្នុងឱកាសពិធីបុណ្យចូលឆ្នាំខ្មែរ។ ទោះជាយ៉ាងណា គេតែងសង្កេតឃើញមានការដំឡើងថ្លៃនៅមុន អំឡុងពេល និងក្រោយថ្ងៃចូលឆ្នាំ។ម្ចាស់ក្រុមហ៊ុនរថយន្តដឹកអ្នកដំណើរ និងអ្នកបើកបររថយន្តឈ្នួលលើកឡើងថាខ្លួនឡើងថ្លៃព្រោះសមត្ថកិច្ចតាមគោលដៅនីមួយៗ បង្ខំឲ្យបង់ប្រាក់ខុសច្បាប់ ។ ឯម្ចាស់ក្រុមហ៊ុនខ្លះលើកឡើងថាការឡើងថ្លៃនេះ ដើម្បីទូទាត់ប្រាក់បន្ថែមឲ្យបុគ្គលិកដែលធ្វើនៅថ្ងៃសម្រាកបុណ្យទាន៕
