លោក ឱម យ៉ិនទៀងថា នឹងសើរើរឿងអង្គរក្សឯកឧត្តម កឹម សុខា វាយស្រ្តីដែលអះអាងថាជាប្រពន្ធចុង
ប្រធានអង្គភាព ប្រឆាំងអំពើពុករលួយលោក ឱម យ៉ិនទៀង បានអះអាងថា អង្គភាពរបស់លោកនឹងបើកការស៊ើបអង្កេត និងសរសេរជារបាយការណ៍លើករណីអង្គរក្សឯកឧត្តម កឹម សុខា ពីរនាក់ ដែលលោកស្រី កែវ សុផាន់ណារី អះអាងថា អង្គរក្សទាំងនោះ បានវាយលោកស្រី និងម្តាយរបស់លោកស្រី កាលពីខែមិថុនាឆ្នាំ ២០១៣។លោក ឱម យ៉ិនទៀង ដែលកំពុងតែពិភាក្សាករណីនេះយ៉ាងយកចិត្តទុកដាក់នោះ បានបញ្ជាក់ថា អាជ្ញាយុកាលនៃបទល្មើសនេះ នៅមិនទាន់អស់សុពលភាពនៅឡើយទេ ហើយអង្គភាពប្រឆាំងអំពើពុករលួយ នឹងសរសេរជារបាយការណ៍ហើយស្នើទៅតុលាការឲ្យបើកការស៊ើបអង្កេតម្តងទៀត ដោយលោកអះអាងថា ករណីនេះតុលាការធ្លាប់ទម្លាក់ការចោទប្រកាន់ម្តងហើយ។
លោកស្រី កែវ សុផាន់ណារី ដែលអះអាងថា ខ្លួនជាប្រពន្ធចុងឯកឧត្តម កឹម សុខា ហើយមានកូនជាមួយប្រធានស្តីទីគណបក្សប្រឆាំងដល់ទៅ ២ នាក់នោះ លើកឡើងថា អង្គរក្សឯកឧត្តម កឹម សុខា ដែលបានវាយលោកស្រ្តីនិងម្តាយរបស់លោកស្រ្តីកាលពីខែមិថុនា ឆ្នាំ ២០១៣ នៅខេត្តព្រៃវែងនោះ កំពុងតែធ្វើជាអង្គរក្សឯកឧត្តម កឹម សុខា ដដែល។ លោកស្រី ប្រាប់ACU ចំៗថា អង្គរក្សឯកឧត្តម កឹម សុខា ទាំងពីរនាក់នោះ ទី ១ ឈ្មោះ ថាល់ និងទី ២ ឈ្មោះ ផល្លា។ ប្រភពថ្មីៗ
http://www.thmeythmey.com/?page=detail&ctype=article&id=40656&lg=kh
