លោក ហ៊ុន សែន ស្នើឲ្យបណ្ដាទូតកែទម្រង់ខ្លួន ហើយកុំធ្វើជា«សេក» និយាយតាមបក្សប្រឆាំង
ពិធីរំលឹកខួបទី ៦៥ឆ្នាំ ថ្ងៃបង្កើតស្ថាប័នគយ និងរដ្ឋាករកម្ពុជានៅព្រឹកនេះ លោកនាយករដ្ឋមន្ត្រី ហ៊ុន សែន បានប្រាប់ទៅបណ្ដាអង្គទូតទាំងអស់ថា កុំទាន់ព្រួយបារម្ភស្ថានការណ៍នយោបាយនៅកម្ពុជា ព្រោះកម្ពុជាគ្មានវិបត្តិនយោបាយដូចជាការលើកឡើងរបស់បក្សប្រឆាំងនោះទេ។ ប្រមុខរដ្ឋាភិបាលស្នើឲ្យបណ្ដាអង្គទូត ស្គាល់ស្ថានការណ៍នយោបាយនៅកម្ពុជាឲ្យបានច្បាស់សិន មុននឹងថាជ្រៀតជ្រែកចូលកិច្ចការផ្ទៃក្នុងប្រទេសកម្ពុជា។នាយករដ្ឋមន្ត្រី ហ៊ុន សែន ក៏បានស្នើឲ្យបណ្ដាអង្គទូតទាំងនោះ កែទម្រង់ខ្លួន ក្នុងការទទួលព័ត៌មានពិតច្បាស់លាស់សិន ដោយមិនត្រូវធ្វើជា«សេក» និយាយតាមតែបក្សប្រឆាំងនោះឡើយ។ «ទូតនានាខ្ញុំសូមឲ្យកែទម្រង់ទៅ ថ្ងៃមុនខ្ញុំសូមឲ្យទូតអាល្លឺម៉ង់ ខ្ញុំសូមឲ្យអឺរ៉ុបកែទម្រង់ កែទម្រង់ទទួលព័ត៌មាន ព្រោះអឺរ៉ុបតែងទទួលព័ត៌មានអត់ច្បាស់ទេ។ ហើយខ្ញុំផ្ដាំតាមឯកអគ្គរដ្ឋទូតអាល្លឺម៉ង់ ឲ្យប្រាប់ឯកអគ្គរដ្ឋទូតEU ថានៅភ្នំពេញត្រូវកែទម្រង់ពីរ ទី១ កែទម្រង់ប្រភពទទួលព័ត៌មាន និងទី២ ត្រូវកែទម្រង់ឲ្យស្គាល់អង្គហេតុនិងអង្គច្បាប់»។ នេះជាការលើកឡើងរបស់ប្រមុខរដ្ឋាភិបាល៕
http://www.thmeythmey.com/?page=detail&ctype=article&id=41550&lg=kh&
