សហភាពអឺរ៉ុប ពន្យារពេលផ្តល់សម្ភារបច្ចេកទេសដល់គ.ជ.ប
តាមការគ្រោងទុក សហភាពអឺរ៉ុប ត្រូវផ្តល់ជំនួយផ្នែកសម្ភារបច្ចេកទេស ទៅឲ្យគណៈកម្មាធិការជាតិរៀបចំការបោះឆ្នោត ដែលហៅកាត់ថា គ.ជ.ប នៅថ្ងៃទី១៥ ខែកក្កដានេះ។ ប៉ុន្តែគម្រោងនេះ ត្រូវបានខកខាន ដោយសហភាពអឺរ៉ុប សុំលើកពេលទៅថ្ងៃក្រោយវិញ។គ.ជ.ប នៅតែបន្តរង់ចាំឧបករណ៍បច្ចេកទេស ដែលជាជំនួយរបស់សហភាពអឺរ៉ុប។ សភាពអឺរ៉ុប បានស្នើសុំពន្យារពេល ក្នុងការបញ្ជូនសម្ភារបច្ចេកទេស ទៅកាន់គ.ជ.ប ក្នុងខែកក្កដានេះ។ នេះជាការលើកឡើងរបស់លោក ហង្ស ពុទ្ធា អ្នកនាំពាក្យរបស់គជប ដែលបានប្រាប់សារព័ត៌មានថ្មីៗ។
ម្យ៉ាងទៀត លោក ហង្ស ពុទ្ធា ក៏មិនអាចបញ្ជាក់ថា សហភាពអឺរ៉ុប នឹងផ្តល់សម្ភារទាំងនោះ ដល់គ.ជ.បនៅពេលណាឲ្យជាក់លាក់នោះទេ។ លោកគ្រាន់តែបង្ហើបថា សភាពអឺរ៉ុប ទំនងជាពន្យារពេល រហូតផុតខែកក្កដានេះ ទើបប្រគល់សម្ភាបច្ចេកទេស ជូនគ.ជ.ប។ លោក បញ្ជាក់បែបនេះថា៖«ខ្ញុំក៏មិនទាន់ដឹងដែរ តែប្រហែលជាដាច់ខែនេះហើយមើលទៅ»។ បើតាមការអះអាងរបស់លោក ហង្ស ពុទ្ធា កន្លងមក ឧបករណ៍បច្ចេកទេសដែលសភាពអឺរ៉ុប នឹងប្រគល់ឲ្យគ.ជ.ប មានដូចជា កំព្យូទ័រ, ឧបករណ៍ស្កេនមេដៃ, កាមេរ៉ាសុវត្ថិភាព (Security Camera), ឧបករណ៍ផ្ទុកភ្លើង (Power Bank), ឧបករណ៍ភ្ជាប់អិនធើណិត និង ម៉ាស៊ីនភ្លើង ជាដើម។ប្រភពថ្មីៗ
https://www.thmeythmey.com/?page=detail&ctype=article&id=42333&lg=kh&
