មេឃុំខេត្តព្រះវិហារថាមន្ត្រីបក្សកាន់អំណាចបង្ខំឲ្យបញ្ជាក់លិខិតស្នាក់នៅឲ្យទាហានមកពីតំបន់ផ្សេង
មន្ត្រីគណបក្សប្រឆាំងនៅខេត្តព្រះវិហារ អះអាងថា ដំណើរការចុះឈ្មោះអ្នកបោះឆ្នោតទៅក្នុងបញ្ជីថ្មីរយៈពេល ៦ថ្ងៃមកនេះ គឺមានភាពមិនប្រក្រតីមួយចំនួនបានកើតមាននៅក្នុងតំបន់ដែលពួកគេរស់នៅ។ ភាពមិនប្រក្រតីនោះ គឺមានការដឹកជញ្ជូនទាហានជាច្រើននាក់ដែលមិនធ្លាប់ស្នាក់នៅក្នុងឃុំនោះទាល់តែសោះ ឲ្យទៅចុះឈ្មោះបោះឆ្នោត ព្រមទាំងបង្ខំឲ្យអាជ្ញាធរឃុំធ្វើលិខិតបញ្ជាក់ការស្នាក់នៅឲ្យទាហានដែលពួកគេមិនដែលស្គាល់ទាំងនោះផង។មន្ត្រីក្រុមប្រឹក្សាឃុំឆែប២ ស្រុកឆែប ខេត្តព្រះវិហារ មកពីគណបក្សប្រឆាំង កំពុងពិចារណាលើការដកខ្លួនចេញពីការងាររបស់រដ្ឋនៅថ្នាក់ឃុំមួយរយៈ ដើម្បីគេចចេញពីការគាបសង្កត់ដែលតម្រូវឲ្យរូបគាត់ធ្វើលិខិតបញ្ជាក់ការស្នាក់នៅទៅឲ្យទាហានជាច្រើននាក់ ដែលគាត់មិនធ្លាប់ស្គាល់។ការដកខ្លួនចេញពីការងារឃុំមួយរយៈនេះ ដោយសារតែគាត់មិនចង់ធ្វើលិខិតបញ្ជាក់ការស្នាក់នៅទៅឲ្យទាហានជាច្រើន ដែលគេដឹកជញ្ជូនពីតំបន់ផ្សេងដើម្បីឲ្យមានសិទ្ធិចុះឈ្មោះបោះឆ្នោតនៅក្នុងឃុំរបស់គាត់ទេ។មេឃុំឆែប២ មកពីគណបក្ស សម រង្ស៊ី គឺលោក ពុធ ស្រេង។ លោកអះអាងនៅរសៀលថ្ងៃអង្គារ ទី៦ ខែកញ្ញា ថា រយៈពេល ២-៣ថ្ងៃជាប់គ្នាមកហើយ លោកបានឃើញទាហានជាច្រើនត្រូវគេដឹកជញ្ជូនមកពីតំបន់ព្រំដែនខ្មែរ-ថៃ ដើម្បីទៅចុះឈ្មោះបោះឆ្នោតនៅក្នុងឃុំរបស់លោក។ លោកមេឃុំដដែលបញ្ជាក់ថា ទាហានទាំងនោះមិនធ្លាប់ស្នាក់នៅក្នុងឃុំឆែប២ ទេ ហើយរូបលោកក៏មិនដែលស្គាល់ដែរ។ប្រភពFRA
http://www.rfa.org/khmer/news/politics/irregularities-in-the-voter-registration-in-preahvihear-09062016082611.html
