សៀវភៅ កែម ឡី ត្រូវបានដាក់តម្កល់នៅបណ្ណាល័យជាតិ
ភ្នំពេញៈ ក្រុមអ្នកចងក្រងសៀវភៅលោក កែម ឡី កាលពីរសៀលថ្ងៃព្រហស្បតិ៍ម្សិលមិញបានយកសៀវភៅដែលពួកគាត់បានចងក្រងពីស្នាដៃរបស់អ្នកវិភាគល្បីឈ្មោះដែលត្រូវគេបាញ់សម្លាប់រូបនេះដាក់តម្កល់នៅបណ្ណាល័យជាតិ និងតាមបណ្ណាល័យសាកលវិទ្យាល័យមួយចំនួនដើម្បីសម្រាប់សាធារណជនបានអាន និងយល់ដឹងពីគំនិតទស្សនៈលោក កែម ឡី ដែលបានលាតត្រដាងពីបញ្ហាចាក់ស្រែះជាច្រើនដែលកំពុងធ្វើឲ្យរាំងស្ទះដល់ដំណើរការអភិវឌ្ឍសង្គមកម្ពុជា។
លោក ហង្ស វិទូ សមាជិកក្រុមអ្នកចងក្រងសៀវភៅលោក កែម ឡី និងក្រុមការងាររបស់លោកបានយកសៀវភៅរបស់លោក កែម ឡី ចំនួន ២០ ក្បាល ដាក់តម្កល់នៅបណ្ណាល័យជាតិ និង ១០ ក្បាលដាក់នៅសាកលវិទ្យាល័យជាតិគ្រប់គ្រង។ លោកបានបន្តថាសាកលវិទ្យាល័យក៏ដូចជាបណ្ណាល័យជាតិបានទទួលយកសៀវភៅទាំងនោះដាក់ក្នុងបណ្ណាល័យរបស់ខ្លួន។ លោកឲ្យដឹងដែរថាលោកនឹងចែកសៀវភៅលោក កែម ឡី ចំនួន ១០០០ ក្បាលដល់បណ្ណាល័យ និងសាកលវិទ្យាល័យមួយចំនួនទៀតក្នុងក្រុងភ្នំពេញ។ប្រភពPostkhmer
