គ.ជ.បថានឹងរកមធ្យោបាយឲ្យពលករចំណាកស្រុកអាចចុះឈ្មោះបោះឆ្នោតជាតិឆ្នាំ២០១៨
មន្ត្រីនាំពាក្យគណៈកម្មាធិការជាតិរៀបចំការបោះឆ្នោត (គ.ជ.ប) អះអាងថា គ.ជ.ប នឹងរកមធ្យោបាយដើម្បីជួយសម្រួលឲ្យពលករចំណាកស្រុក អាចមកចុះឈ្មោះបោះឆ្នោតជ្រើសតាំងតំណាងរាស្ដ្រក្នុងឆ្នាំ២០១៨ ខាងមុខ។ ការអះអាងនេះ ក្រោយពី គ.ជ.ប ប្រកាសបិទបញ្ចប់ការចុះឈ្មោះបោះឆ្នោតក្រុមប្រឹក្សាឃុំ-សង្កាត់ជាស្ថាពរ ហើយនៅមានពលរដ្ឋជាង ១លាននាក់ ភាគច្រើនគឺពលករចំណាកស្រុក ពុំបានមកចុះឈ្មោះ។នៅថ្ងៃទី២ ធ្នូ គឺជាពេលវេលាបិទបញ្ចប់ដំណើរការទាំងស្រុងនៃការចុះឈ្មោះបោះឆ្នោត សម្រាប់បម្រើឲ្យការបោះឆ្នោតជ្រើសតាំងក្រុមប្រឹក្សាឃុំ-សង្កាត់ ឆ្នាំ២០១៧ ស្របពេលមន្ត្រីនាំពាក្យ គ.ជ.ប អះអាងថា ខ្លួនពុំមានលទ្ធភាពដើម្បីពន្យារពេលបន្ថែមក្នុងការផ្ដល់ឱកាសឲ្យពលរដ្ឋ និងជនចំណាកស្រុក បានមកចុះឈ្មោះទៀតទេ។មន្ត្រីនាំពាក្យគណៈកម្មាធិការជាតិរៀបចំការបោះឆ្នោត (គ.ជ.ប) លោក ហង្ស ពុទ្ធា ប្រាប់អាស៊ីសេរី ថា គ.ជ.ប នឹងពិភាក្សាជាមួយគណបក្សមានសំឡេងក្នុងរដ្ឋសភាទាំងពីរ ដើម្បីស្វែងរកមធ្យោបាយសម្រួលធ្វើយ៉ាងណាឲ្យពលរដ្ឋ រួមទាំងពលករចំណាកស្រុកស្របច្បាប់ជាង ១លាន ១សែននាក់ និងពលករមិនស្របច្បាប់រាប់សែននាក់ផ្សេងទៀត អាចមកចុះឈ្មោះបោះឆ្នោតជ្រើសតាំងតំណាងរាស្ដ្រនៅក្នុងឆ្នាំ២០១៨ ខណៈពួកគេបានអាក់ខានមិនបានមកចុះឈ្មោះបោះឆ្នោតសម្រាប់ជ្រើសតាំងក្រុមប្រឹក្សាឃុំ-សង្កាត់នៅឆ្នាំ២០១៧។ប្រភពRFA
