លោកកឹម សុខា ស្នើរដ្ឋសភាផ្លាស់ប្តូរសម រង្ស៊ី ចេញពីប្រធានក្រុមតំណាងរាស្ត្រសម្លេងភាគតិចក្នុងរដ្ឋសភា
(ភ្នំពេញ)៖ លោកកឹម សុខា ប្រធានស្តីទីគណបក្សសង្គ្រោះជាតិ បានធ្វើលិខិតទៅអគ្គលេខាធិការដ្ឋានរដ្ឋសភា កាលពីព្រឹកថ្ងៃទី០៥ ខែធ្នូ ឆ្នាំ២០១៦ ដើម្បីស្នើសុំផ្លាស់ប្តូរសមាសភាពតំណែងប្រធានក្រុមតំណាងរាស្ត្រសម្លេងភាគតិចនៅក្នុងរដ្ឋសភា ដែលមានលោកសម រង្ស៊ី ជាប្រធាន។ ការស្នើនេះ គឺលោកកឹម សុខា ដាក់រូបគាត់ធ្វើជាប្រធានក្រុមតំណាងរាស្ត្រសម្លេងភាគតិចនៅក្នុងរដ្ឋសភាជំនួសលោកសម រង្ស៊ី វិញ។
លោកសម រង្ស៊ី ត្រូវបានរដ្ឋសភាប្រកាសទទួលស្គាល់ជាប្រធានក្រុមតំណាងរាស្ត្រសម្លេងមតិភាគតិច នៅក្នុងរដ្ឋសភាដោយមានឋានៈស្នើឧបនាយករដ្ឋមន្ត្រី កាលពីថ្ងៃទី២០ ខែមករា ឆ្នាំ២០១៥ លោកឡេង ប៉េងឡុង អគ្គលេខាធិការនិងជាអ្នកនាំពាក្យរដ្ឋសភា បានប្រាប់រស្មីកម្ពុជា កាលពីរសៀលថ្ងៃទី០៥ ខែធ្នូ ឲ្យដឹងថា លោកកឹម សុខា ប្រធានស្តីទីគណបក្សសង្គ្រោះជាតិ បានធ្វើលិខិតមកសភាកាលពីថ្ងៃទី០៥ ខែធ្នូ ឆ្នាំ២០៦ ដោយដាក់សមាសភាពថ្មីនៃក្រុមតំណាងរាស្ត្រសម្លេងភាគតិចនៅក្នុងរដ្ឋសភា គឺលោកកឹម សុខា ជាប្រធាន (ជំនួសលោកសម រង្ស៊ី) , លោកយឹម សុវណ្ណ ជាអនុប្រធាននិងលោកយ៉ែម បុញ្ញឫទ្ធិ ជាសមាជិក។ប្រភពរស្មីកម្ពុជា
